ЖҮГЕНСІЗ ЖҮРГІЗУШІ

Петропавл қаласының “Ударник” түнгі клубының маңында екі қызды қағып кеткен “Лексус” көлігінің жүргізушісі іздестіріліп жатыр.

Жол-көлік оқиғасы 15 қыркүйекте таңғы сағат төрт жарымда орын алған. Автокөлік жүргізушісі жолды кесіп өтіп бара жатқан екі қызды қағып кетіп, оқиға орнынан ізін суытқан. Жол-көлік апаты фактісі бойынша Қазақстан Республикасының Қылмыстық кодексінің 345-бабы 2-бөлімі, яғни “Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы” бойынша сотқа дейінгі тергеу басталды.

– Жол-көлік оқиғасы бойынша сот сараптамасы тағайындалды. Сотқа дейінгі тергеудің материалдары облыстық ішкі істер департаменті тергеу басқармасына беріліп, ведомство басшылығының бақылауына алынды, – деді облыстық ішкі істер департаменті баспасөз қызметінің бас маманы Нұрбек Баекин.

Жәбірленушілер түрлі дене жарақаттарымен ауруханаларға жеткізілген. Олардың біреуі ауыр халде. Облыстық денсаулық сақтау басқармасы басшысының орынбасары Дәуренбек Бейсембаевтың айтуынша, 25 жастағы петропавлдық үш күннен бері әлі есін жимаған.

– Таңғы сағат бестер шамасында облыстық ауруханада бас миының және өзге де ауыр дене жарақаттарын алған қызға ота жасалды. Алдымен, Астанадағы Ұлттық нейрохирургия институты мамандарына хабарласып, кеңес алдық. Қазір ол аурухананың жан сақтау бөлімінде жатыр. Алдағы қалжағдайы туралы болжам айту қиын, – деді ол.

1996 жылы туған екінші жәбірленуші қалалық №3 ауруханаға жеткізіліп, тиісті көмек көрсетілген. “Қазір оның жағдайына алаңдайтындай қауіп төніп тұрған жоқ. Ол жалпы травматология бөліміне шығарылды”, – дейді дәрігер.

“Лексус” автокөлігінің рөлінде отырған ер адамды полицейлер іздестіруде.

Зәуреш АСЫЛБЕКОВА,

“Солтүстік Қазақстан”.

Add comment


Security code
Refresh

Біздің мекенжайымыз: 150000. Қазақстан Республикасы, Петропавл қаласы, К.Сүтішев көшесі, 7-үй. Газет поштасы: This email address is being protected from spambots. You need JavaScript enabled to view it.

Яндекс.Метрика