«Soltüstık Qazaqstan»

PDF

АЛАШ ЖОЛЫ – АЗАТТЫҚ

Елордадағы ұлттық музейде Солтүстік Қазақстан өңіріндегі Алаш қозғалысына арналған екі ғылыми еңбектің тұсаукесері өтті. Жиынға қоғам және мемле­кет қайраткерлері, мәдениет са­ласының өкілдері мен ғалымдар қатысып, Алашорда тарихы мен Алаш зиялыларының қоғамдық- саяси қызметі туралы сөз қозға­ды.

«ХХ ғасыр басындағы Сол­түстік Қазақстан: Алаш зиялы­ларының қоғамдық-саяси қыз­меті» (авторлары А. Ибраева, С.Мәлікова, З.Тайшыбай) атты монографиялық еңбекте Алаш қозғалысының тарихи маңыз­дылығы, Алаш саяси партиясы­ның және Алашорда үкіметінің Солтүстік Қазақстандағы қо­ғамдық-саяси қызметі, рухани мұрасы жайында құнды мәлі­меттер берілген. Алаш қозғалы­сы қайраткерлерінің ел азатты­ғын аңсауы, күрескерлік деңгей­ге көтерілуі нақты деректік ма­териалдармен, мысалдармен па­йымдалған. Туынды авторлары Алаш қайраткерлерінің қыз­метін, олардың қилы тағдырын, қуғын-сүргінге ұшыраған кез­дегі тергеу істерін тарихи факті­лер негізінде әсерлі жеткізген.

«Алаш жолы – еліміздің Тәуелсіздігіне қызмет ететін ру­хани мұра, қасиетті де әлеуетті күш. Ел еңсесін тіктейтін, жас­тарды жасампаздыққа жете­лейтін, қалың қауымды ынты­маққа бастайтын, халық бойын­дағы имандылықты еселейтін құндылық. Қос туынды кітапха­на сөрелеріне жеткізіліп, оқыр­мандардың ұлт тарихына деген сүйіспеншілігін оятады деп се­неміз», – дейді облыстық мем­лекеттік архивтің директоры Сәуле Мәлікова.

Тұсауы кесілген екінші – «Қазақстанның Солтүстік өңіріндегі Алаш қозғалысы мұрағат деректерінде» (авторлары А.Иб­раева, С.Мәлікова, З.Тайшы­бай, А.Темірханова) мұрағаттық құжаттар және материалдар жи­нағы облыстық мемлекеттік ар­хивтің, Қазақстан Республика­сы мен Ресей Федерациясы ар­хив қорларының материалдары негізінде құрастырылған.

Іс-шара аясында музейдің ғылыми қызметкері Данияр Дүйсенбай Алаш қайраткері Әлти Көкенұлының атақоны­сын зерттеу негізінде қазақтың үй салу дәстүрін жаңғырту мақ­сатында жүргізілген ғылыми- зерттеу жұмыстары туралы баяндама жасап, Алаш мұрасын зерттеу және насихаттау ісінде археологияның үлесіне тоқтал­ды.

Рабиға ЕРАЛЫ,

«Soltüstık Qazaqstan».

Әлеуметтік желілерде бөлісіңіз:

Share on facebook
Facebook
Share on telegram
Telegram
Share on whatsapp
WhatsApp