Жыл сайын сүйікті қаламыздың көрікті орындары көбейіп, көздің жауын алатын сан алуан ғимараттарымен, гүлзарларымен, жайқалған жасыл саябақтарымен қуантып келеді. Бұл жолы жергілікті билік қала тұрғындары мен қонақтарына қазақтың бас ақыны Абай Құнанбайұлының портреті бейнеленген муралды сыйға тартты. Оны өңір басшысы Құмар Ақсақалов аға буын өкілдерімен бірге тамашалап, бірер күн бұрын ғана толығымен аяқталған жобаға жоғары бағасын берді.
Хакімнің туғанына 175 жыл толуына орай Абай және Әуезов көшелерінің қиылысындағы бес қабатты тұрғын үйдің қабырғасында бейнеленген мурал Құмар Іргебайұлының бастамасымен іске асып отыр. Өңір басшысы әсем қаламыздың ғажайып келбетіне көрік қосатын, алыстан көз тартатын картина салу жөнінде Қазақстан Суретшілер одағының мүшесі Болат Әсербеков пен қала басшылығына ұсыныс жасаған. Санаулы уақыт ішінде әсем де зәулім картина салынып, бүгінде ақын атындағы көшенің бойында тұратын азаматтардың мақтанышына айналды. Керамикалық плиталардан жасалған композиция үйдің бір қабырғасын алып тұр. Ортасында Абайдың портреті бейнеленсе, жан-жағы қазақтың ою-өрнектерімен безендірілген. Жоба авторы Болат Әсербековтің айтуынша, туындыға сапасы жоғары плиткалар пайдаланылған. Яғни, олар қыстың суығына, жаздың ыстығына төтеп бере алады және кемінде жүз жылға дейін жарамдылық қасиетін жоғалтпайды. “Биыл еліміз бойынша суретшілер мен архитекторлар тарапынан бас ақынымызға арналған бірқатар жұмыстар жүргізілді. Облыс әкімі мен қала басшылығы маған мурал салу жөнінде ұсыныс білдіргенде, бұған бірден келістім. Өйткені, өзім де Абайға арнап жоба бастауды көптен бері ойлап жүрген едім. Ақын портретін салып жатқан кездің өзінде маған осы маңда тұратын азаматтар хабарласып, ризашылықтарын білдірді. Ал, енді бүгіннен бастап ресми түрде ашылып жатқан еңбегімізді оңынан бағалайтындар қатары бұдан да арта түседі деген сенімдеміз”, – дейді автор.
Алаңға жиналған ардагерлер мен қала тұрғындары тамаша туындыны тудырған жоба ұйымдастырушылары мен авторларына алғыстарын жарыса жеткізіп жатты. Облыстық ардагерлер кеңесінің төрағасы Ескендір Елеусізов пен археолог Анатолий Плешаков ақынның бейнесін дөп басып сала білген жұмыс авторының шеберлігін сөз етсе, Абайтанушы, ардагер журналист Зарқын Тайшыбай еліміздің біртуар тұлғаларын насихаттайтын осындай орындардың көбірек болуына тілектестік білдірді.
Осыдан кейін облыс әкімі Құмар Ақсақалов Н.Погодин атындағы облыстық орыс драма театрының жөндеу жұмыстарымен де танысты. Шілде айында бастау алған күрделі жөндеу жұмыстарына бюджеттен 212 млн. теңге қаржы бөлінген. Облыстық мәдениет, тілдерді дамыту және архив ісі басқармасы басшысының орынбасары Досбол Әбдірисовтің айтуынша, құрылысқа “Мирас груп” және “Санэлектротех” ЖШС-лары жауапты. Бүгінде 100-ге жуық құрылыс маманы театр ғимаратының қасбетін, орталық алаңын, көрермендер залын және екінші қабатын жөндеп жатыр.
Бұл мәдениет нысанына соңғы рет жөндеу жұмыстары 2000 жылдардың басында жүргізілген екен. Бірер аптадан соң қаламыздағы жұртшылық жиі бас сұғатын мәдениет ордаларының бірі ерекше кейіпке енеді. Бұған дейін шатыры жөнделіп, пластик терезелер орнатылған. Ендігі кезекте ғимаратта жылыту, жарық жүйелері жөнделіп ағаш есіктер орнату жұмыстары жүргізілуде. Жоба бойынша құрылысшылар сахнаны жартылай өзгертіп, залда жарық шамдары ауыстырылады.
Гүлбике КУБЕНОВА,
“Soltústik Qazaqstan”.
Суретті түсірген
Талғат ТӘНІБАЕВ.