Бүгінде еліміз бойынша 6300-ден астам ауыл болса, бұларда жалпы халықтың 41 пайызы қоныстанған. Жасыратыны жоқ, жыл өткен сайын ауылдарда тұратын адамдардың саны азайып барады. Былтыр жарты миллионға жуық тұрғын қалаларға көшкен. Осы үдерісті тежеу мақсатымен 2004 жылдан бастап 6 бағдарлама қабылданып, 2 трлн. теңгеден астам қаражат бөлінген.
Президент Қасым-Жомарт Тоқаев Ұлттық қоғамдық сенім кеңесінің жақында өткен төртінші отырысында сөйлеген сөзінде еңбек миграциясына қатысты маңызды мәселелерді тағы да ортаға салды. Ішкі көші-қонға қатысты ахуалды жақсартудың, көшіп келушілерге барынша қолайлы жағдай жасаудың маңызды екенін атап көрсетті. “Бұл, ең алдымен, азаматтарымызды еліміздің оңтүстігінен солтүстігіне көшіруге қатысты. Осы мәселе Ұлттық кеңесте бірнеше рет көтерілді. Оны кешенді түрде шешу үшін, біріншіден, электронды еңбек биржасының базасында бірыңғай ақпараттық кеңес құру керек. Екіншіден, көшуге қатысты мәселелерді оңайлатқан жөн. Мемлекет мигранттарға барынша қолайлы жағдай жасауы тиіс”, – деді Президент.
Ел ішіндегі миграциялық үдерістерді реттеу ісінің тиімділігін арттыру мақсатымен мигранттарға берілетін жәрдемақы мөлшерін екі есеге көбейтуді тапсырды. Яғни, мигранттарды ынталандыратын қосымша шара ретінде оларға берілетін жәрдемақы мөлшері 35 айлық есептік көрсеткіштен 70-ке дейін көбейтіледі. Үкіметке бір айдың ішінде осы мәселені зерттеп, тиісті шешім қабылдау жүктелді. Сондай-ақ, Мемлекет басшысы атажұртқа оралған қандастар мәселесін де қозғады.
Облыстық жұмыспен қамту және әлеуметтік бағдарламалар басқармасы оралмандармен және қоныс аударушылармен жұмыс жүргізу бөлімінің басшысы Алма Махметованың мақаласының толық нұсқасын газетіміздің бүгінгі санынан оқи аласыздар.