Петропавл медициналық колледжінде білім алатын 18-24 жас аралығындағы 20 студент арнайы бағдарлама шеңберінде сырқаттарға алғашқы жәрдем беру амалдарын үйреніп, білімдерін толықтыруда. Олар оқу аяқталған соң облыс орталығындағы ауруханаларда ем қабылдап жатқан науқастарға көмекке келіп, тәжірибелі дәрігерлермен қатар жұмыс істейтін болады.
Аталмыш оқу орнында білім алып жатқан 3-курс студенті Карина Мұқатаева еріктілер қатарына қабылдау шарасы жүргізіліп жатқанын оқытушысынан естіген. Бірден курсқа жазылып, бүгінде тәжірибелі медицина қызметкерлерінің дәрістерін тыңдап, шеберлігін шыңдауда. “Біз оқу орнында білім алумен қатар науқастарға ем-дом жүргізіп, аурухананың жұмысына араласамыз. Бұл дегеніңіз, біз үшін үлкен мүмкіндік қой”, – деген ерікті өзі сияқты болашақ мамандармен бірге медициналық көмек көрсетудің қарапайым түрлерін үйренуде.
Қазір жастар облыстық жедел медициналық көмек орталығының дәрігері Владимир Жуковтың дәрістерін тыңдап, сұрақ-жауап түріндегі сабақтарға қатысуда. “Еріктілердің қазіргі пандемия жағдайында шақыртуларға шығуы қауіпті. Сондықтан олар ауруханалар қабырғасында науқастарға қарапайым медициналық қызметтерді ұсынып, инъекциялар жасап, жүрек-бұлшық етке жаттығу амалдарын жүргізетін болады. Біз сабақ барысында манекенді пайдалану арқылы осы және өзге де іс-қимылдарды үйретудеміз”, – дейді Владимир Жуков.
Оқу курсы аяқталған соң болашақ медицина қызметкерлері емдеу мекемелеріне жөнелтіледі. Олардың арасында 1 курста оқитын жастар да бар.
Гүлбике КУБЕНОВА,
“Soltústik Qazaqstan”.