Мамлют ауданының тұрғыны Александр Беккель 2017 жылдан бастап жылқы шаруашылығымен айналысып келеді. Уақыт өте келе жеке кәсіпкер Қамбар ата төлінің санын көбейтуге бел буады. Алайда жылқы көбейген сайын жайылымдық және шабындық жерге қажеттілік туындаған.
Аталған мәселені шешу үшін Александр Беккель “Жер аманаты” бағдарламасы бойынша конкурсқа өтінім берген. Оны комиссия мүшелері қарап, жеке кәсіпкерге 86 гектар жер беруді ұйғарған. Кәсіпкер бөлінген жер учаскесін тиімді пайдаланбақшы. Себебі ол келешекте ірі қара мен қой өсіруді жоспарлап отыр.
“Мал шаруашылғымен айналысамын деушілерге шабындық пен жайылымдық жер ауадай қажет. Жер қатынастары бөлімі бос жатқан жерлерді анықтап, оларды конкурстық өтінімге береді. Бұл жағынан ешқандай кедергі жоқ. Сондықтан барлық шаруаларға осы конкурсқа қатысыңыздар дегім келеді. Өзім жылқы шаруашылығына 2017 жылы ден қойдым. Қазір 30 бас жылқым бар. Етті бағытта да жұмыс істейміз, жылқы санын көбейтумен де айналысамыз”, – деді Александр Беккель.
Биыл Мамлют ауданы бойынша 1500 гектар жерді мемлекет меншігіне қайтару жоспарланған еді. Аудандық жер қатынастары бөлімі осы жылы 1707 гектар жерді қайтарған. Жоспар 113 пайызға орындалған. Барлық жер учаскелері “Жер аманаты” бағдарламасы бойынша байқауға қойылды.
“Бүгінгі таңда 10 лот ойнатылып, жер пайдаланушыларға 1507 гектар жер берілді. Оған 35 конкурстық өтінім қалдырылған. Жер комиссиясы конкурстық өтінімге тапсырылған бизнес-жоспарларды есепке алды. Барлық учаскелер мал шаруашылығымен айналысатын агроқұрылымдарға берілді”, – деді Мамлют аудандық жер қатынастары бөлімінің басшысы Раушан Сайпенова.
Аманжол НҰРТАЗИН,
“Soltüstık Qazaqstan”.