Отандық агроөнеркәсіп кешенін дамытуға, саланың бәсекеге қабілеттілігі мен әлеуетін арттыруға зор үлес қосып отырған “Зенченко және К” командиттік серіктестігінің директоры Геннадий Зенченко 60 жасқа толды. Мерейтой иесін Мемлекет басшысы Қасым-Жомарт Тоқаев құттықтады. Президенттің Алғыс хатын өңір басшысы Ғауез Нұрмұхамбетов арнайы барып табыстады.
Әке жолын қуған Геннадий Зенченко – табысты кәсіпкер ғана емес, сонымен қатар ауылдың дамуына айтарлықтай үлес қосып отырған меценат. Оның еңбегі мен өз ісіне адалдығының арқасында Қызылжар ауданындағы Новоникольское елді мекені республикадағы ауыл шаруашылығы өндірісі өркендеген, әлеуметтік саласы дамыған үлгілі ауылға айналды.
“Сіздің қажырлы еңбегіңіз, адалдығыңыз, озық технологияларды пайдалануыңыз “Зенченко және К” компаниясының заманауи ауыл шаруашылығы кластері және танымал қазақстандық бренд ретінде дамуына ықпал етті. Сіздің белсенді азаматтық ұстанымыңыз, аймақтың қоғамдық өміріне қатысуыңыз және маңызды қайырымдылық жобаларды жүзеге асыруыңыз үлкен құрметке лайық. Айтулы белес – 60 жасқа толуыңызбен құттықтаймын! Зор денсаулық, амандық, барлық істеріңіз мен бастамаларыңызға сәттілік тілеймін”, – делінген Президенттің құттықтауында.
Өз кезегінде Геннадий Геннадьевич Мемлекет басшысы мен облыс әкіміне ұдайы көрсетілетін қолдаулар үшін алғысын білдірді.
“Президентімізге, жергілікті билік өкілдеріне зор алғыс білдіргім келеді. Біз әрқашан көшбасшылардың қатарында болдық. Осы межеден төмендемеу – басты міндетіміз. Мен әрдайым ұжымға бірінші болу оңай екенін, бірақ қандай жағдай болмасын көш басынан түспеу керектігін айтып отырамын. Еліміз нық қадаммен алға басып келеді. Отанымыздың гүлденуі үшін еңбек ете береміз”, – деді Геннадий Зенченко.
Ақерке ДӘУРЕНБЕКҚЫЗЫ,
“Soltüstık Qazaqstan”.