Сәбит Мұқанов атындағы облыстық қазақ сазды-драма театрында ауыл шаруашылығы қызметкерлері күніне арналған салтанатты жиын өтті. Көрме ұйымдастырылып, өңірдің үздік кәсіпорындары өз өнімдерін көпшілік назарына ұсынды. Іс-шараға облыс әкімі Ғауез Нұрмұхамбетов қатысып, саланың дамуына үлес қосқан қызметкерлерді марапаттады.
Өңір диқандары биылғы жылды көңіл қуантарлық көрсеткіштермен қорытындылап отыр. Ауыл шаруашылығының жалпы өнім көлемі 1 триллион теңгеге жетті. Өндіріс көлемі өткен жылмен салыстырғанда айтарлықтай өсіп, облысымыз республика бойынша бірінші орынға шықты. Күз мезгілінің соңғы айында тойланатын осынау мереке – тынымсыз еңбектің қорытындысын шығаратын уақыт қана емес, сондай-ақ өңір диқандарының жанкешті еңбегіне алғыс білдірудің тамаша мүмкіндігі. «Биыл Солтүстік Қазақстан облысы елдің аграрлық өндірісінің көшбасшысы екенін тағы бір мәрте дәлелдеді. Мемлекет тарапынан берілген теңдессіз қолдау мен еңбеккерлеріміздің қажырлы жұмысының арқасында 6,5 млн. тоннадан астам астық, 1,2 млн. тонна майлы дақыл жиналды. Мал шаруашылығы бағытында да айтарлықтай нәтижелер бар. Өңірде мегафермалар салынып, заманауи инновациялық технологиялар енгізілуде», – деді өңір басшысы Ғауез Нұрмұхамбетов.
Биыл ауыл шаруашылығы саласына мемлекет тарапынан бұрын-соңды болмаған қолдау көрсетілді. Көктемгі егіске және орақ жұмыстарына 161 млрд. теңге бағытталып, қосымша 75 млрд. теңге субсидия берілген. Еңбегі ел деңгейінде бағаланған жерлестеріміз аз емес. «Мәмбетов және К» серіктестігінің механизаторы Мұрат Қаражұманов «Қазақстанның Еңбек Ері» атағына ие болды. «Қазақстанның аграрлық саласының еңбек сіңірген қайраткері» құрметті атағы Серік Малаевқа табыс етілді.
Салтанатты іс-шарада үздік еңбеккерлер сахна төрінен көрінді. Елдің ауыл шаруашылығы саласын дамытуға қосқан елеулі үлесі үшін 3 азамат «Құрмет» орденін алды. Ғабит Мүсірепов атындағы ауданда орналасқан «Намыс» ЖШС-ның жүргізушісі Азат Атнагулов «Ерен еңбегі үшін» медалімен марапатталды. Одан өзге бірқатар адамға Ауыл шаруашылығы министрлігі мен облыс әкімінің Құрмет грамотасы және Алғыс хаты табысталды. «Біз биыл мол өнім алдық. Егін бітік шықса, шаруалардың да көңілі жайланады. Жұмыс сапасын арттыру үшін салаға жасанды интеллект элементтерін пайдаланудамыз. Әріптестерімді кәсіби мерекелерімен шын жүректен құттықтаймын. Отанымыздың дамуы жолында ерінбей еңбек ете берейік», – деді «Полтавское» жауапкершілігі шектеулі серіктестігі директорының орынбасары Ерлан Зікірин.
Ақерке ДӘУРЕНБЕКҚЫЗЫ,
«Soltüstık Qazaqstan».