Петропавлдық жас волонтерлер коронавирус індетінің алдын алу үшін көмек қолын созуда. Осыдан бір апта бұрын басталған акция барысында жастар шаһар көшелерін аралап, тұрғындарға маска, қолғап және қауіпсіздік ережесі жазылған жадынамалар таратуда.
“Қоғамдық даму және ақпарат орталығы” коммуналдық мемлекеттік мекемесінің жастар бастамалары бөлімінің мәліметінше, волонтерлер жасағының құрамына енгендердің басым бөлігі – университет пен колледж студенттері. Санитарлық-эпидемиологиялық талаптардың сақталуын қадағалау мақсатында ұйымдастырылған акцияның алғашқы күні қыз-жігіттер қалалықтар көп шоғырланатын жерлерде болып, 400 маска, 100 қолғап және 150 ақпараттық жадынама үлестірді. Аптаның соңына дейін жалғасатын шара кезінде 2 мыңнан астам жеке қорғау заттары мен жадынама тарату жоспарланған. “Волонтерлер жұмыстарын адал атқаруда. Кез келген сәтте қол ұшын беруге әзір”, – дейді “Қоғамдық даму және ақпарат орталығы” коммуналдық мемлекеттік мекемесінің бөлім басшысы Анастасия Волкова.