Осыдан он жылдан астам бұрын жерлестеріміз футболдан еліміз біріншілігінің премьер-лигасында жақсы ойын өрнегін көрсетіп, жүлдегерлер қатарынан көрінген еді. Олар, тіпті, Қазақстан чемпионатында күміс және қола медаль жеңіп алғаны есімізде. Алайда, одан кейін футболшыларымыз жанкүйер көңілінен шығатын нәтиже көрсете алмады.
Биылғы ел біріншілігінде өңіріміздің “Қызылжар ” командасы футболдан үшінші орынды иеленді. Өңір басшысы Ерік Сұлтанов аяқдоп шеберлерін Н.Погодин атындағы облыстық орыс драма театрында салтанатты түрде марапаттады.
– Өңірлік “Қызылжар” командасының қола жүлдесі – облысымызда футбол спортының жақсы дамып келе жатқандығының айқын дәлелі. Облыста соңғы екі жылда 263 үлкен және шағын футбол алаңдары салынып, оның 46-сына жасанды жамылғы төселді. Бүгіндері жастардың осы спорт түрімен шұғылдануларына барлық жағдай жасалуда. Сол себепті, футболшыларымыз әлі талай белесті бағындырады деген сенімдемін, – деді облыс әкімі.
Өңір басшысының құттықтау сөзінен кейін сахнаға спорт ардагерлері шығып, кейінгі толқынға толағай табыстар тіледі.
– Біз бұл сәтті 2001 жылдан бері асыға күттік. Командаға және оған қолдау көрсеткен адамдарға алғысым шексіз. Өңіріміздегі футболдың дамуы көңілге қуаныш ұялатады. Былтыр футболдан өткен қала біріншілігіне алты команда ғана қатысса, биыл олардың қатары екі есеге артты, – деді қазақша күрестен Қазақстанның бірнеше дүркін чемпионы Бауыржан Құлжанов.
Футболшылар әрбір жетістігіне бапкерлерінің тәлімі мен жанкүйерлерінің қолдауының арқасында жететіні анық. “Қызылжар СҚ” футбол клубының капитаны Евгений Аверченко оларға команданың атынан алғысын жеткізді.
Салтанат барысында ел біріншілігінде ерекше өнер көрсеткен футболшылар ұлықталды. Тимурбек Закиров “Үздік қақпашы”, Неманья Видич “Үздік қорғаушы”, Аслан Жанұзақов “Үздік жартылай қорғаушы”, Бошко Ступич “Үздік шабуылшы” атағын иеленді. Ал Али Алиев “Маусымның үздік ойыншысы” атанды.
Салтанатты шара концерттік бағдарламаға ұласты.
Нұржан СЕЙІЛБЕКОВ,
“Солтүстік Қазақстан”.