“ANTIKOR” орталығында өткен брифингте облыстық мемлекеттік кірістер департаментінің басшысы Төлеген Қабдөшев жеке тұлғалардың көлік құралдарына салынатын салық жайында түсінік берді. Оның айтуынша, 92 мың жеке тұлғаның атына 136 мың көлік тіркелген. Олардың 10 мыңға жуығы заңға сәйкес салықтан босатылған.
– ҰОС-ның ардагерлері және жеңілдіктері бойынша соларға теңестірілген ардагерлер, басқа мемлекеттердің аумағында соғысқан майдангерлер, көпбалалы аналар, батыр аналар, “Алтын алқа” және “Күміс алқа” иегерлері, мүгедектер көлік салығынан босатылады,– деді Төлеген Қабдөшев.
Өткен 9 айдың ішінде бюджетке 642 млн. теңге салық түскен. Салық амнистиясын пайдаланған 11 мың адам 180 млн. теңге негізгі қарызын жапқан. Нәтижесінде олардың 20 млн. теңгеге жуық өсімпұлы кешірілген. Алайда, атқарылған жұмыстарға қарамастан, 21 мың солтүстікқазақстандық әлі 467 млн. теңге қарыз.
25 тамыздан елімізде жеке тұлғаларға салықтық амнистия қарастырылғаны белгілі. Осының аясында азаматтар мүлік, жер және көлік салығының негізгі қарызын жапқан жағдайда, өткен жылдардағы өсімпұлдары кешіріледі. Бұл мүмкіндік жыл аяғына дейін берілген.
Армениядан әкелініп, тіркелген көліктердің иелері де салық төлеуге міндетті. Бірінші маусымнан бастап өңірімізде 336 автокөлік тіркелді.
Өмір ЕСҚАЛИ,
“Soltústik Qazaqstan”.