Сәбит Мұқанов атындағы облыстық қазақ сазды-драма театрының ұжымы жаңа маусымның басталуына орай бұқаралық ақпарат құралдары өкілдерімен кездесті. Қыркүйектің 16-сында өнер ордасы көрермендерге Сәбит Мұқановтың “Шоқан” тарихи драмасының премьерасын ұсынған болатын. Ұжым жыл соңына дейін тағы 4 қойылым сахналамақ.
20 жылдық тарихы бар облыстық театр кезекті маусымын тың серпіліспен, жаңа құраммен бастағалы отыр. Сахна шымылдығын түрген “Шоқан” спектаклі ғалым Шоқан Уәлихановтың – 185, академик жазушы Сәбит Мұқановтың – 120 және өнер ошағының 20 жылдығына тарту болды. Театр труппасы ұлы ғалымның өмірі мен жарқын істеріне арналған туындыны алғаш рет 2000 жылы сахналаған екен. Бүгінде тарихи драма қайта өңделіп, жаңа идеялармен толығып, өзгеше форматта ұсынылған. Сондай-ақ, биылғы маусымда Әбу Насыр әл-Фарабидің мерейтойына орай да жаңа қойылым сахналанбақ. Қоюшы режиссеры – Фархадбек Қанафин. Ол Шахмет Құсайынов атындағы Ақмола облыстық қазақ музыкалық-драма театрында “Арман-ақжелкен”, “Ай тұтылған түн” және “О, қыздар!” спектакльдерін сахнаға шығарып, талантты режиссер ретінде танылған. Ұлы ойшылдың рөлін сомдау бақыты жас актер Айбол Қасымға бұйырып отыр.
Бұдан басқа әртістер хакім Абайға арналған жаңа спектакль әзірлеу үстінде. Театр өз мерейтойына орай тың бастаманы қолға алған. Жыл соңына дейін өткен уақытта көрерменін тапқан 100-ге жуық спектакль жайлы ақпарат беретін арнайы жинақ жарыққа шықпақ.
Биыл ұжым қатары жаңа кадрлармен толыққан. Нұр-Сұлтан қаласындағы Қазақ ұлттық өнер университетінің түлегі Нұрислам Әбділ бірер айдан бері әдебиет бөлімінің меңгерушісі болып еңбектеніп жүр. Ал театрдың беткеұстар әртістерінің бірі, “Мәдениет саласының үздігі” төсбелгісінің иегері Дәурен Тойбазаров көркемдік жетекші қызметіне кіріскен. Оның айтуынша, бүгінде сахнагерлер қатары үш жас әртіспен және бір хореографпен толыққан.
Киелі шаңырақта өнер көрсеткісі келетіндер тарапынан сұраныстар арта түскен. Алайда, жас мамандарды жұмысқа қабылдау үшін алдымен олардың әлеуметтік жағдайын шешу керек. Бүгінде мұнда жұмыс істеп жүрген жастардың көбінің баспанасы жоқ. Театр басшылығы жұмыспен қамту орталығымен бірлесіп, екі әртістің бір жыл бойғы пәтер жалдау ақысын мемлекеттік қаржы есебінен өтелуіне қол жеткізген. Бұдан бөлек, ұжымдық келісімшарт бойынша жас мамандардың пәтерақысының 40 пайызын өтеуге қаржы бөлу қарастырылған. Өзге де қызметкерлердің әлеуметтік жағдайын шешу мақсатында тиісті орындарға өтініш білдірілген. Мәселен, театр басшылығы басында баспанасы жоқ өнер адамдарына жатақхана салып беру жөнінде депутаттарға жүгініпті.
Киелі орданың бүгінгі тыныс-тіршілігімен таныстырған театр директоры Біржан Жалғасбаев журналистердің сұрақтарына жауап бере отырып: “Елдегі ахуалға байланысты мекемелердің біразы жұмысын тоқтатып, онлайн форматқа ауысқаны белгілі. Араға жарты жыл салып, барлық санитарлық-эпидемиологиялық талаптарды сақтай отыра, біздің ұжымымыз өз жұмысына қайта кірісті. Бүгінде белгіленген ара қашықтықты сақтау мақсатында көрермендерімізді аз құраммен ғана қарсы алып жатырмыз”, – деді. Ол соңында ұжым мүшелерінің театр залының халыққа лық толған кездерін, өнерсүйер қауымның ыстық ықыласын сағынғанын да жасырмады. “Өнердегі кез келген адам, ең алдымен, тыңдарманымен, көрерменімен бақытты. Біз сахнада тұрып, театрға келгендердің қойылымды көріп, өнерімізге риза болғанынан шабыт аламыз, одан әрі талпына түсеміз. Әлем бойынша орын алған мына жағдайдың тезірек аяқталып, жуық арада залымыз бұрынғыдай халыққа лық толып, алтындай көрермендерімізбен асыға қауышатын сәттер әлі де көп болады деген үміттеміз”, – деп ағынан жарылды.
Гүлбике КУБЕНОВА,
“Soltústik Qazaqstan”.
Суретті түсірген
Талғат ТӘНІБАЕВ.