Облыстың білім беру мекемелеріндегі күзет қызмет-керлерінің 76 пайызының жасы елуден асқан. Яғни өңірдегі мектептер мен балабақшаларды негізінен физикалық дайындығы төмен егде адамдар күзетеді деген сөз. Бұл мәселені облыстық полиция департаментінің бастығы Айдын Қабдұлдинов көтерді.
– Олар нақты қауіп төнген жағдайда өздерінің физикалық мүмкіндіктері мен даярлығының жоқтығынан шабуылды немесе террористік актіні болдырмайтын тиісті шараларды қабылдай алмайды. Бұл мәселе бұған дейін де қаралды, нақты шешім қабылдау қажет, – дейді Айдын Қабдұлдинов.
Департамент бастығының айтуынша, облыста террористік тұрғыдан осал 368 білім беру нысаны бар. Соның ішінде 160 білім беру нысанына лицензияланған жеке күзет ұйымдары қызмет көрсетеді, ал қалған нысандарды бұрынғыша вахтерлар күзетеді.
Облыстық білім басқармасының мәліметінше, жеке күзет ұйымының күзетшісі лауазымына 19 жастан кем емес және күзетшінің арнайы даярлығынан өткен Қазақстан Республикасының азаматтары қабылдануы тиіс. Десек те биыл 15 мамырда Оқу-ағарту министрі «Білім беру ұйымдарында күзет қызметтерін сатып алу жөніндегі үлгілік конкурстық құжаттаманы бекіту туралы» бұйрыққа қол қойғанын айта кеткен жөн. Онда күзетші лауазымына 25-тен 50 жасқа дейінгі адамдар ғана қабылданатыны айтылған.
– Шарт бір жылға жасалатындықтан, желтоқсан айына дейін шарттық міндеттемелер аяқталғанын күтеміз, – деді облыстық білім басқармасының баспасөз хатшысы Әсел Оразбаева.
Басқарманың мәліметінше, облыста террористік тұрғыда осал мектептердің 200-і 1-топқа, қалған 86-сы 2-ші топқа жатады. Бүгінгі таңда мамандандырылған күзет талаптарға сәйкес 2-ші топтағы нысандардың барлығында бар. Оларда 431 адам еңбек етеді, осы күзет қызметкерлерінің өзінің 328-інің жасы 50-ден асқан.
Мамандардың айтуынша, бұл жұмысқа жастар келе бермейді, өйткені күзетшілердің жалақысы 100-120 мың теңге шамасында.
Ақерке ДӘУРЕНБЕКҚЫЗЫ,
«Soltüstık Qazaqstan».