Қазақстандық аралас жекпе-жек шебері Шавкат Рахмонов “UFC 254” турнирінде алғашқы кездесуін өткізіп, бразилиялық қарсыласын мерзімінен бұрын жеңді.
“Ковбой” лақап атымен танымал бразилиялық файтер Алекс Оливейра бұл кездесуде отандасымызға қарсы бір раунд та қарсы тұра алмады. Жекпе-жектің бірінші кезеңі аяқталуға санаулы секундтар қалғанда ол қазақстандықтың жасаған қылқындыру әдісінен кейін жеңілгенін мойындап, жекпе-жекті жалғастырудан бас тартты. Осылайша, қазақстандық спорттық мансабындағы – 13-ші, ал әлемдік белді ұйым “UFC” аясындағы алғашқы жеңісіне қол жеткізді.
Шавкат Рахмонов “Жауынгерлер аралында” өткен ережесіз жекпе-жекте қомақты сыйақыға ие болғанын да айта кеткен жөн. Ол октагонға шыққаны үшін 10 мың АҚШ доллары және жеңісі үшін дәл соншама сыйақы алды. Бұдан бөлек, қарсыласының таразыдағы салмағы артық болғаны үшін ол Шавкат Рахмоновқа өз гонорарының 14 мыңын “сыйлайды”.
Айта кетейік, “UFC 254” турнирінің басты жекпе-жегінде ресейлік Хабиб Нурмагомедов пен америкалық Джастин Гэтжи жұдырықтасқан болатын. Дағыстандық саңлақ екінші раундта қарсыласын “ұйықтатып” тастады. 29-шы жеңісіне қол жеткізген Хабиб Нурмагомедов жекпе-жек соңында спорттық мансабын аяқтайтынын мәлімдеді.