Қазақ халқы ғасырлар бойы ұлан-байтақ жерін талай жаудан көздің қарашығындай қорғағанына тарих куә. Бүгінгі таңда ата-бабаларының асыл мұрасын сақтаған ұрпақтың тәуелсіз Қазақстанның туын желбіретіп отырғанына – 23 жыл. Ата-баба мұраты орындалды деген осы шығар. Енді, міне, бүгінгі таңда жаңа Қазақстан әлемдік аренада алар орны бөлек жас мемлекетке айналып отыр.
Елдің бірлігіне, ынтымағына қылау түсірмеу – ұлттың ғана емес, қазақ жерін мекен еткен барша этнос өкілдерінің міндеті. “Радзіма” облыстық беларусь мәдени орталығының бұл бағыттағы жұмысы 2003 жылы басталған болатын. Сол уақыттан бері ұйым мүшелері мемлекеттің саясатын қолдап, мемлекеттік мерекелер мен атаулы күндерге бір кісідей атсалыса отыра, өз ұлтының мейрамдарын естен шығармай, ардагерлерін ардақ тұтып, туған тілі мен мәдениетін, салт-дәстүрлерін сақтауда еңбек етіп келеді. Жуырда өткен “Жас ұрпақ – бір шаңырақ астында”, “Салт-дәстүр” сияқты облыстық фестивальдарға қатысып, “Бірлік – Единство” жастар форумында белсенділік таныттық. “Біз – қазақстандықтармыз!” деген сөзді ерекше тебіреніспен айтатын беларусьтықтар елдегі бірлікті нығайтып, ынтымағы жарасқан Қазақ елінің берекесін тасытуға осылайша үлес қосуды мақсат тұтады.
Елбасының ұсынысымен құрылған Қазақстан халқы Ассамблеясының жұмысын дамыту үшін алғашқы жылдары аға буын өкілдері бар күш-жігерін салса, қазір біздер, жас ұрпақ, оны әрі қарай жалғастырудамыз. Жылдар бойы Қазақстанда өз ұлтымыздың тілі, мәдениеті, тарихы жандандырылып келсе, енді бірлігіміз жарасқан еліміздің болашағы үшін атқарар жұмысымыздың аясын кеңейтіп, маңызды міндеттерді орындауымыз қажет. Біздің тағдырымыз Қазақстанның саяси-экономикалық дамуымен тығыз байланысты. Яғни, ел ертеңі – біздің де болашағымыз.
Мария ЧЕРНЫШОВА,
“Радзіма” облыстық беларусь орталығының төрайымы.