Жергілікті жерлерде ауылдық округ әкімдерінің, шаруашылық басшыларының араласуынсыз бірде-бір шара өтпейтіні белгілі. Адамдардың тұрмысын жақсарту жолында атқа қонған жергілікті билік өкілдері мен маңдайын күн қақтаған диқандарға жүктелетін міндеттерді санамалап тауыса алмайсың. Олардың көлденең көзге көріне бермейтін, шын мәнінде қауырт қимылға толы, зейнетінен бейнеті, алғысынан “қарғысы” көптеу жанкешті жұмысының елене бермейтіні тағы бар. Құрамында еңбек ардагерлері, депутаттар бар топ елді мекендердің тыныс-тіршілігімен танысып, ауылдарда нендей істер атқарылып жатқанын көріп қайтты.
Аудандық мәслихаттың хатшысы Ерлан Әділбеков жетекшілік еткен топ мүшелері алдымен “Привольный” ЖШС-не ат басын тіреді. Бауыржан Тасмағанбетовтің басқаруындағы серіктестік 640 сиырға арналған сүт кешенінің құрылысын бастапты. Жоба құны – 1,5 млрд. теңге. Аудандағы алғашқы ірі сүт кешеніне Симменталь тұқымдас сиырлар Германиядан әкелінбек.
Аталмыш шаруашылық ауылдағы стадионның құрылысына 50 млн. теңге аударған. Ал саябақ салуға облыстық бюджеттен 50 млн. теңге бөлініпті. Онда тың игерушілерге арнап стелла, соғыс ардагерлеріне ескерткіш орнатылмақ. Мектеп ғимараты анадайдан көз тартады. Республикалық қазынадан 137 млн. теңге жұмсалып, қалпына келтірілген. Маңайын асфальттау жұмыстары шаруашылықтың есебінен атқарылған. Аз уақыттың ішінде бірталай істің басы қайтарылғаны көрініп-ақ тұр.
“Мен осы ауылға анамның сүтінің дәмі аузымнан кетпеген кезде келіппін. Мектепті осында бітірдім. Жоғары оқу орнын тамамдап, басқа жақта еңбек етіп жүрсем де, құлынтайдай тебісіп өскен алтын бесігім есімнен шыққан емес. Сүйікті ұстаздарыма, ауылдастарыма бір көмегімді тигізуді армандайтынмын. Ойымның орындалғанына қуанамын”, – дейді Бауыржан Иманбайұлы өзіне тән сергек үнмен.
Топ мүшелері Новоишимка кентінде оңтүстік өңірлерден көшіп келетін отбасылар үшін тұрғызылып жатқан баспаналардың жайымен танысты. “Еңбек” бағдарламасы аясында ауданда 59 үйдің құрылысы жүргізілуде. Іші жылы әрі кең. Су сылдырап ағып тұр. Үйлердің маңайын абаттандыру, қора-қопсы салу жұмыстары ғана қалыпты. Мәдениет үйін жөндеуге нәтижелі жұмыспен қамту және жаппай кәсіпкерлікті дамыту бағдарламасы аясында 44,4 млн. теңге бөлінген.
Ғабит Мүсірепов атындағы Мәдениет үйін аралағаннан кейін мәдени-бұқаралық шараларды жадандыру төңірегінде бірқатар бағалы ұсыныстар айтылды. Жеңіс саябағы да адам танымастай өзгерген. 2 субұрқақ ауылға ерекше көрік беріп, шырайын аша түскен. Аумақты дамыту бағдарламасы бойынша көшелерге 200-ге жуық шам орнатылып, түннің өзін самаладай жарық ете түскен. Гагарин, Пионер, Островский, Солнечный көшелері өзгеше кейіпке енген. Тұрғындардың ризашылығы шексіз. Қай-қайсысымен сөйлессең де, аумақты дамыту ісі қарқынды жүріп жатқанын жарыса айтады. Заман ағымына сай талғаммен безендірілуін құптайды. Өнер мектебінде атқарылған ауқымды жұмыстар да көңіл сүйсінтті.
Жуырда ғана пайдалануға берілген 50 пәтерлік үйдің бас мердігері “ПМК-5” ЖШС басшылығының айтуынша, пәтерлердің кілттері жетім және ата-ана қарауынсыз қалған балаларға, көпбалалы отбасыларға, медицина қызметкерлеріне, мемлекеттік қызметшілерге тапсырылыпты. Компания жергілікті құрылыс материалдарын қолданғандықтан, баспана бағасы да қолжетімді. “Ауыл – ел бесігі” бағдарламасы бойынша жалпы ұзындығы 46,1 шақырымға жететін 45 көшені жөндеуге республикалық бюджеттен 702,5 млн. теңге бөлінген.
Белсенді топ бұдан соң Нежинка-Ерке ауылына барды. “Еңбек” бағдарламасы аясында мектептің күрделі жөндеу жұмыстарына 147 млн. теңге бөлініп, едені ауыстырылған, электр жарығы, жылу, кәріз жүйелері жаңаланған. Мектеп директоры Серік Жахин “Нежинка-Ерке” ЖШС-і жыл сайын сыныптарға жиһаз сатып алуға, балаларды тегін тамақтандыруға жүйелі түрде көмектесетінін жеткізді. Биыл бұл мақсатқа 4 млн. теңге қарастырылыпты. Ауыл ақсақалы Бақыт Нұркин жарты ғасыр бойы жөндеу көрмеген білім үйіне қаражат бөлініп, қайта қалпына келтірілгеніне алғыстан басқа айтары жоқ екенін жеткізді.
Жұмыс сапары Рузаев ауылдық округінде жалғасты. Кәрібай Шаяхин басқаратын “ПМК-5” ЖШС-і мұндағы Мәдениет үйін қараған адамның көзі тоймас зәулім сарайға айналдырыпты. Бағалы тастармен көмкерілген шамдар еріксіз мойын бұрғызады. Жарық әрі жайлы жаттығу залдарына спорт жабдықтары қойылған. Бір сөзбен айтқанда, демалыс үшін барлық жағдай жасалған. Ойын-сауық бөлмесіне кіргенде сиқырлы ертегі әлеміне тап болғандай әсер аласың. Мұнда тұрғындар отбасымен бірге бос уақыттарын өткізіп, спортпен шұғылдана алады. “MGA Dorstroy”, “Строисвет”, “Кенжекеев” серіктестіктерінің белсене араласуымен көшелерді асфальттау, жарықтандыру, жолдарды жөндеу мәселелері де ойдағыдай шешіліпті.
Чистополье ауылдық округінің әкімі Қанат Амантаев абаттандыру жұмыстарымен таныстырғаннан кейін топ мүшелері Тахтаброд ауылдық округінде орналасқан “Ақселеу” ЖШС-не бағыт алды. Шаруашылық басшысы Серік Малаев тұрғындардың әлеуметтік жағдайын жақсарту басым бағыт саналатынын, өз тарапынан барлық мүмкіндіктер қарастырылатынын сөзіне арқау етті. Үйлер түгелге дерлік сумен жабдықталған. Биоотынмен жылытылатын орталық қазандық тұрғын үй секторының үштен бірін қамтамасыз етеді. Келесі жылы 100 пайызға жеткізілмек. 1-4-сынып оқушылары, 3 және одан да көп балалары бар отбасының оқушылары тегін тамақтанады. Бала туғанда 40 мың теңге, бір жасқа толғанға дейін ай сайын 10 мың теңге мөлшерінде жәрдемақы беріледі. Үйлену тойларына, жерлеу рәсімдеріне қаржылық көмек көрсетіледі. Өңір басшысы Құмар Ақсақаловтың оңтүстік облыстардан көпбалалы отбасыларды көшіріп әкеліп, ауыл турғындарының санын арттыру, жағдай жасау, жұмыспен қамту бастамасына орай 16 үй салыныпты. Еңбеккерлердің жалақысын көбейту, еңбек өнімділігін ұлғайту бағытында да тындырымды істер баршылық. Шаруашылықта 15000 гектар алқап болса, оның 14000 гектарына бидай дақылдары егіледі. Бұдан бөлек, 490 бас Герефорд тұқымды сиыр, 200 бас жылқы өсіріледі.
Аудандық мәслихат хатшысы Ерлан Әділбековтің басқаруымен ауылдық оргугтерді аралаған топтың бір күндік сапарының соңында Елбасы Нұрсұлтан Назарбаевтың: “Туған жерге айрықша іңкәрлікпен атсалысу – шынайы патриотизмнің маңызды көрінісі”, – деген сөзін еске алдық.
Шолпан САЛЫҚОВА.
СУРЕТТЕ: еңбек ардагерлері мен депутаттар “Привольный” ЖШС-індегі сүт кешенінің құрылысымен танысуда.
Ғабит Мүсірепов атындағы аудан.