Қазіргі заманғы қосымша білім беруге жас буынның құштарлығы артып келеді. Президент Қасым-Жомарт Тоқаев халыққа арнаған Жолдауында азаматтардың сауаттылығы мен цифрлық біліктілігін арттыру мақсатында Үкіметке үздіксіз білім беру тұжырымдамасын дайындауды тапсырды. Бұл құжатта бейресми білім берудің баламалы нұсқаларын көптеп енгізу, өз бетінше оқу нәтижелерін мойындау, кәсіби дағдыларды сертификаттау мәселелері кеңінен қарастырылатын болады.
Коронавирус індетінің салдарынан мектеп оқушыларының көпшілігі білім алудың қалыптасқан дәстүрлі тәсілінен қол үзіп, қашықтан оқуға көшуге мәжбүр болды. Мұның өзі толыққанды оқу үдерісіне жаңашыл сипаттар беру үшін тың тәсілдер ойластыру талаптарын алға тартты. Мемлекеттік білім беру саясаты тұрғысынан алып қарағанда, бұл ауыл оқушылары үшін теңсіздікті азайтудың пәрменді құралына айналар еді. Өйткені, ауылдық жерлердің 35,5 пайызының, аз қамтылған отбасылардың 68 пайызының ғана қосымша оқытумен қамтылуы мәселенің өте өзекті екенін көрсетеді.
Оқушылар сарайы ғылыми-жобалау және ғылыми-зерттеу қызметін, STEM-білім, бизнес-білім беруді ұйымдастырудың қызғылықты бағыттарын ұсыну арқылы балалардың прогрессивті дамуына, кәсіби өзін-өзі тануға, сауатты бизнес-идеялар жүргізуге, ғылым әлемінде жаңа дүниелерді танып-білуге айтарлықтай ықпал жасап келеді. “Өрлеу” біліктілікті арттыру ұлттық орталығының облыстық филиалы Оқушылар сарайымен бірлесіп, “Қосыл, оқы, дамы…” Live On Stage” қосымша білім беру навигаторын іске қосты. Ондағы идея – қосымша білім беру мобильді навигаторы құрылымы негізінде Оқушылар сарайының ресурстарымен таныстыру, ауыл мектептері және ерекше қабілетті жеткіншектер үшін практикалық маңыздылығын ғылыми-әдістемелік жағынан түсіндіру.
Іс-шараға мектеп директорлары, ауыл оқушылары, қамқоршылық кеңесінің мүшелері, ата-аналар комитетінің өкілдері, пән мұғалімдері тартылып, республикалық қосымша білім беру оқу-әдістемелік орталығының директоры Раиса Шер жоғары баға берді. Педагогтардың біліктілігін арттыру институты филиалының директоры Алма Мырзалинова, Оқушылар сарайының директоры Дина Әбілмәжінова “Қосымша білім беру әр Қазақстан оқушысының өмірінде болуы керек” тақырыбында пайдалы диалог өткізді.
Оқушылар сарайынының күнделікті тәжірибесінде IT саласындағы өзекті әдістемелік және бағдарламалық-аппараттық қамтамасыз ету, ғылыми-биологиялық және көркемдік іс-шаралар жүйелі түрде атқарылады. Мысалы, SDR-радио, дрондарды құрастыру, роботтарды бағдарлайтын техника, электроника және электротехника, физика, химия, биология зертханалары мен кабинеттері қызықты жобалар жасайды. “Атамекен” ұлттық кәсіпкерлер палатасы мен “Аstana Hub” IT-стартаптар халықаралық технопаркі ұсынылған бағдарламалар шеңберінде оң сараптамалық баға берді. Демек, оқушылар мектепте алған білімдерін тәжірибе жүзінде қалай қолдану керектігін жете меңгеріп, мағыналы істерге зияткерлік және шығармашылық әлеуетін толық қуатында жұмсай алады деген сөз.
Бір сөзбен айтқанда, Оқушылар сарайының педагогтар ұжымын STEM-білім беру форматында ғылыми-зерттеу шығармашылығы мен бизнес-оқыту жүйесінде үйірмелердің интеграторлары рөлін орындауға қабілетті, сауатты және жауапты мамандар ретінде сипаттауға болады. Әр оқушыға тұлғалық-бағдарлы көзқарас тұрғысынан келіп, шығармашылық даму, интеллектуалдық шабыт бере білетін, жаңа идеяларға қозғау салатын кеңесші, дос ретінде рөл атқаруы құптарлық. Сүйікті іспен айналысу әркімнің арманы десек, білік пен білімділік қанат жайған жерде жетістік баянды етіліп жаста, құба-құп.
Әмина ТАЙЛАНОВА,
Айман КЕҢБЕЙІЛОВА,
“Өрлеу” БАҰО облыстық филиалының бас мамандары.