Солтүстік Қазақстан облысында өзендердегі су деңгейі біртіндеп көтеріліп келеді. Осыған байланысты 34 маманнан құралған құтқарушылар тобы аудандарды аралауға шықты, деп хабарлайды Qyzyljarnews.kz тілшісі.
«Қазгидромет» өкілдерінің мәліметінше, 3 сәуірде Есіл өзені мен оның салаларында мұз жұқарып, шағын өзендерде су деңгейінің көтерілуі байқалған. Покровка және Новоникольское ауылдарының жанында Есіл өзені 4 және 9 сантиметрге көтерілді. Тәуліктік көрсеткіш 1-ден 47 сантиметрге дейінгі аралықты көрсеткен. Жалпы облыс бойынша судың ең жоғары деңгейі Северное ауылының жанында Шағалалы өзеніндегі гидробекетте тіркелді.
Төтенше жағдайлар жөніндегі департамент баспасөз қызметінің ақпаратына сүйенсек, сәуірдің 3-і құтқарушылар мен арнайы автокөліктер, моторлы қайықтар Тимирязев, Айыртау және Ғабит Мүсірепов атындағы аудандарға аттанды.
Фото СҚО ТЖД баспасөз қызметінен алынды