“Зенченко және К” командиттік серіктестігінің бас директоры Геннадий Зенченко Қазақстанның Еңбек Ері атанды.
Елімізге танымал кәсіпкер ауыл шаруашылығы қызметкерлері күніне орай өткен форумда Президент Қасым-Жомарт Тоқаевтың қолынан “Отан” орденін қоса алды. Облыстық әкімдікте өткен салтанатты шарада жерлесімізді өңір басшысы Ғауез Нұрмұхамбетов, әріптестері мен достары құттықтады.
“Геннадий Зенченко – ғұмырын ауыл шаруашылығы саласына арнаған әулеттің даңқты жолын жалғастырып келе жатқан тұлға. Оның агроөнеркәсіптік саладағы мол тәжірибесі, ауыл шаруашылығы саласын дамытуға қосқан елеулі үлесі зор алғысқа лайық”, – деді Ғауез Торсанұлы.
Геннадий Зенченко – табысты кәсіпкер ғана емес, туған ауылының дамуына айтарлықтай үлес қосып отырған меценат. Оның ұйытқы болуымен Қызылжар ауданындағы Новоникольское елді мекені өндірісі өркендеген, тұрғындарға әлеуметтік жағдай жасалған үлгілі ауылдардың біріне айналды. Салтанатты жиын барысында атақты аграрийді достары мен әріптестері де құттықтап, жылы лебіздерін білдірді.
“Біз Президент Қасым-Жомарт Кемелұлының басшымыз Геннадий Зенченконың жемісті еңбегін жоғары бағалағаны үшін қуаныштымыз. Бұл награда қажырлы қайраттың, мықты тәжірибенің және нағыз кәсібиліктің көрінісі деп білеміз. Геннадий Геннадевич үшін шын жүректен қуаныштымыз”, – деді серіктестіктің бас есепшісі Елена Абрамовская.
Отбасылық кәсіптің тізгінін ұстаған Геннадий Зенченко әкесі бастаған істі аяқсыз қалдырмай, табысты еселей білді. Ол еліміздің экономикасын дамытуға елеулі үлес қосып, ауыл шаруашылығы саласына жаңашылдықтар әкелді. Серіктестікте заманауи агротехнологиялардың қолданылуының арқасында жыл сайын жақсы өнім алынады. Азамат өз кезегінде мұндай жетістіктерге ұжымының және жерлестерінің көмегінсіз жете алмайтынын айтып, жылы тілектері мен құттықтауларына алғыс білдірді.
“Менің ізімді ұлым мен немерем басып келе жатыр. Олар да осы салада еңбек етуде. Мемлекет басшысына еңбегімді бағалағаны үшін ризашылығымды білдіремін. Бұл марапатқа ие болу үшін ұзақ әрі қиын жолдан өту керек болды”, – деді Геннадий Зенченко.
Ақерке ДӘУРЕНБЕКҚЫЗЫ,
“Soltüstık Qazaqstan”.