“Өнерлінің өрісі кең” дейді дана халқымыз. Мамлютка қаласында тұратын ерлі-зайыпты Ерғали мен Гүлайна бірнеше жыл бұрын отбасылық вокалдық ансамбль құрып, бүгінде аудан жұртшылығын өнерлерімен тәнті етіп келеді.
Отбасылық ансамбль Ерғали мен Гүлайна шаңырақ көтерген жылы құрылған. Екеуі де – өнер десе ішер асын жерге қоятын жандар. Өнерлерін шыңдау мақсатында түрлі байқауларға қатысу, мерекелік шараларда тыңдарманның көңілін көтеру – бұл жұптың ең сүйікті істерінің бірі. Ерғали Зиябек 2017 жылы аудандық “Жас қанат” конкурсында – бірінші, 2018 жылы Абай оқуларының облыстық кезеңінде екінші орынды иеленген. Көмейіне бұлбұл ұялаған әнші бойындағы өзге де қабілеттерін облыстық “Көтеріңкі көңіл күй шебері” өнер сайысында танытып, бас жүлдені жеңіп алған. Өнерпаздың шәкірттері де түрлі конкурстарда төбе көрсетіп, шығармашылыққа ден қойған. Ал айдай сұлу зайыбы Гүлайна Әшірбаева болса, домбыраны жанына серік еткен. Жұлдызды жұп бүгінде Нұржігіт және Әйкерім есімді ұл-қыз тәрбиелеп отыр.
Гүлбике КУБЕНОВА,
“Soltústik Qazaqstan”.