Елімізде коронавирус індетіне байланысты орын алған төтенше жағдайға сәйкес “Қазақстан Қарулы Күштерінің аумақтық әскерлерін жасақтау үшін әскери міндеттілерді арнайы жиындарға шақыру туралы” Жарлық шықты. Көпшілікке бұл құжаттың маңызын және мақсатын түсіндіріп өтуді жөн санаймыз.
Төтенше жағдай кезінде ел қорғауға жарайтын азаматтарды арнайы шақырып, техногенді немесе табиғи апаттардың, індеттердің және өзге де келеңсіздіктердің зардабын жою – әлем елдерінде бар тәжірибе. Өйткені, түрлі төтенше жағдайлар кезінде оның зардабын жою, алдын алу ісінде тиісті қызмет мамандарының, Қарулы Күштер сарбаздарының аздық ететін кездері болады. Бұл, ең алдымен, халықтың денсаулығы мен қауіпсіздігін жан-жақты қорғауға бағытталған.
Жарлыққа сәйкес әскери жиындар он күннен үш ай мерзімге дейін созылуы мүмкін. Алайда, нақты мерзімді жергілікті әкімдік белгілейді. Қала және облыс әкімдігі шақыртылатын азаматтар санын өздері анықтайды. Сондай-ақ, олар әскери жиындарды ұйымдастырады. Ал кейбір аймақтарда әскери міндеттілерді мүлдем шақырмауы да мүмкін.
Қазір жаһандағы көптеген елдер тәрізді Қазақстан да коронавирустың таралуын тежеуге күш салуда. Бұдан бөлек, кейбір өңірлерде көктемгі су тасқынының алдын алу шаралары жүргізілуде. Ал күн болса жылынып келеді. Міне, дәл осындай сәтте әскери міндетті азаматтар атқарушы билікке, төтенше жағдай кезінде қызмет етіп жатқан құрылымдарға көмекке тартылуда.
Бұл азаматтар Қарулы Күштердің әскери қызметшісі мәртебесін алады және “Әскери қызмет және әскери қызметшілердің мәртебесі туралы” Жарлыққа сәйкес оларға әлеуметтік сипаттағы барлық жеңілдіктер жасалатын болады. Олардың барлығы тегін тамақпен, қажетті заттармен және медициналық көмекпен қамтамасыз етіледі. Сонымен қатар әскери жиындар кезеңінде әскери міндеттілердің жұмыс орны және атқаратын қызметі сақталады. Оларға мемлекет есебінен орташа жалақы, ал жұмыс істемейтін адамдарға – ең төменгі еңбекақы төленеді. Мәселен, әскери жиынға шақырылғанға дейін әскери қызметшінің жалақысы 100 мың теңге болса, жиындағы әр айда ол сол көлемдегі қаражатты алады. Ал ең төменгі еңбекақы мөлшері – 42500 теңге.
Әскери міндеттілердің денсаулығына, отбасы жағдайына, жасына да мән беріледі. Жиынға шақыру кезінде еріктілерге бірқатар артықшылық берілетінін атап айтқан жөн. Шақыртулар негізінен “SMS” хабарламалар арқылы жіберілетін болады. Сондай-ақ, барлық азаматтар бір күнде емес, кезең-кезеңмен шақыртылады. Әскери жиын арқылы оларды төтенше жағдай кезінде арнайы қызметке тарту – бір жағынан елге пайдалы болса, екінші жағынан төтенше жағдайда жұмыссыз қалған азаматтар үшін қолайлы.
Әскери жиындарға шақыртылып, бірақ белгіленген күні келмеген азаматтар әкімшілік жауапкершілікке тартылатындығын атап өткен жөн.
Айман ӘБЖАППАРОВА,
облыстық қорғаныс істері жөніндегі департаменттің қызметкері.
Сурет https://newtimes.kz/ сайтынан алынды.