Облыс әкімі Ғауез Нұрмұхамбетов жұмыс сапарымен Шал ақын ауданында болып, озық бағдарламалардың жүзеге асу барысымен танысты. Соның бірі – қант қызылшасын өсіру мен өңдеуге бағытталған бірегей жоба.
«Asyl Farms» ЖШС алғашқы өнімін жинап, теріскейдің тәуекелге толы қатал климатттық жағдайында да заманауи агротехнологиялардың тиімділігін дәлелдеді. Алдағы уақытта егіс алқабы 10 мың гектарға дейін ұлғайтылмақ. 2028 жылға таман жылына 1 миллион тонна шикізат өңдейтін және 200 мың тоннаға дейін қант өндіретін зауыт іске қосылмақ. Озық жобаның іске асырылуы елдің азық-түлік қауіпсіздігін нығайтып, қант импортына тәуелділікті айтарлықтай төмендетпек. Кәсіпорын картоп өсірумен де айналыспақ. Жиналған өнімді сақтау үшін 8400 тоннаға шақталған көкөніс сақтау қоймасы салынды.
Аудан бойынша инженерлік инфрақұрылымды дамыту, цифрлық жүйені енгізу бағытында да тұрақты өсім бар. 12 елді мекенді таза ауызсумен қамту үшін 12 млрд. теңге бөлінген. 35 шақырым жол жөнделді. Гидротехникалық торапта жағалауды нығайту жұмыстары атқарылуда. Жергілікті қазына қаражаты есебінен аудандық аурухананың жұқпалы аурулар бөлімшесі қалпына келтірілді. Денсаулық сақтау саласына бизнес өкілдері де белсенді қолдау көрсетуде. «Жангелді» шаруа қожалығы Бірлік ауылында медициналық пункт салып, тұрғындардың сапалы медициналық қызметке деген қолжетімділігін қамтамасыз етті.
Мемлекет басшысының тапсырмасына сәйкес Сергеевкада еліміздегі алғашқы аудандық IT-орталық ашылды.
«Бұл – ауылдық өңірлердің цифрлық дамуына жасалған маңызды қадам. Облыс халқының жартысына жуығы ауылдық жерде тұрады. Мұнда жаңа өндірістер ашылып, кәсіпкерлік кеңейіп, жұмыс орындары құрылуда, тиісінше заманауи цифрлық дағдыларды меңгерген кадрларға сұраныс артуда. Сондықтан цифрлық инфрақұрылымды тікелей жергілікті жерлерде дамыту қажет. Жақын арада осындай IT-орталықтар облыстың барлық аудандарында ашылады», – деді облыс әкімі Ғауез Нұрмұхамбетов.
Ауданда халықтың өмір сүру сапасын арттыру және әлеуметтік инфрақұрылымды дамытуға бағытталған бастамалар жүзеге асып жатыр. Жаңа қоғамдық кеңістіктер, саябақтар, заманауи сауда орындары бой көтерді.
Өмір ЕСҚАЛИ,
«Soltüstık Qazaqstan».