«Арабеск» үлгілі би ансамблі Алматыда өткен халықаралық байқаудан жетістікпен оралды. Жас бишілер 51 жүлделі орын, ақшалай сыйлықтар мен жеңімпаз атағын олжалаған. Оларды туған-туыстары мен достары үлкен қуанышпен қарсы алды.
– Бұл сапар оңай болған жоқ. Жол ұзақ болса да балалар ұйымшылдық танытып, жақсы нәтиже көрсетті. Бірінші күні көрермендерге 26 би нөмірін ұсындық. Байқау қорытындысы бойынша біздің ұжым үздік деп танылды, – дейді «Арабеск» үлгілі би ансамблінің көркемдік жетекшісі Татьяна Кравченко.
Екі күнге созылған халықаралық байқауға ансамбль 250 адамдық құраммен аттанды. Қатысушылардың жасы – 4 пен 15 жас аралығында. Олар екі күн бойы таңертеңнен кешке дейін өнер көрсетті.
– Алғашқы байқаулар – «Music Festival» мен «Dance Festival»-де біз үш VIP Grand Prix жүлдесін жеңіп алдық. Ал ұйымдастырушылар өткізген екінші байқау – «Dance Mania»-да үш бірінші орынды иелендік. Мен билегенді ерекше жақсы көремін, себебі музыка мен би – менің жанымның бір бөлігі, – дейді ансамбль қатысушысы Диана Шалдыбекова.
Ансамбль жақында Астанада өтетін беделді республикалық байқауда қаламыздың намысын қорғайтын болады.
Аружан ҚҰРЫМБАЙ,
М.Қозыбаев атындағы СҚУ-дың студенті.