Облыста биылғы тоғыз айда әдеп жөніндегі кеңес мамандары қараған істердің 64 пайызы заң бұзушылықтардың алдын алуға бағытталса, қалғаны тәртіптік істермен байланысты.
Мемлекеттік қызмет істері агенттігі облыс бойынша департаментінің басшысы Ержан Қарымсақовтың айтуынша, әдеп жөніндегі кеңестің бүгінде тәртіптік істерді қараудан басқа да функциясы көбейген. “Кеңестің негізгі міндеті – сыбайлас жемқорлықтың және қызметтік әдеп нормаларын бұзудың алдын алу үшін шаралар әзірлеу, мемлекеттік қызметшілердің жауапкершілік деңгейін арттыру. Яғни кеңес тек жазалаушы орган ғана емес, сонымен қатар мемлекеттік қызметте кәсіби, әдепті ортаны қалыптастыру құралы болып отыр”, – дейді Ержан Қарымсақов.
Көпшілік әлі күнге мемлекеттік қызметте істейтіндер түннің бір уағына дейін жұмыста отыруға мәжбүр деп есептейді. Департамент мамандары мұны құптамайды. Мемлекеттік қызмет істері агенттігі мен оның аумақтық бөлімшелеріне 2023 жылғы мамырдан бастап мемлекеттік органдарда жұмыс уақыты режімінің сақталуына мониторинг жүргізу өкілеттіктері берілген. Сонымен қатар өткен жылдан бастап мемлекеттік қызмет істері жөніндегі уәкілетті орган мемлекеттік қызметшілермен қарым-қатынаста жұмыс беруші жасаған құқық бұзушылықтарды қарау функциясын қоса атқаруда. Яғни департамент қызметкерлердің жұмыс уақытының нормасын заңсыз асырғаны үшін мемлекеттік органдардың басшыларына қатысты әкімшілік шара қолдануға құқылы.
Жыл басынан бері департамент жұмыс уақыты режімінің сақталуына қатысты 13 рет мониторинг жүргізген. Мамандар мемлекеттік органдарға тікелей барып немесе жұмыс уақытын есепке алуды бақылау жүйелерінің деректерін пайдалана отырып қашықтан тексерген. Нәтижесінде артық жұмыс істеген 36 мемлекеттік қызметші анықталды, 30 қызметкерге демалыс сағаттары берілді, ал 6 қызметкерге тиісті төлем жүргізілген.
“Мемлекеттік қызметшілердің артық жұмыс істеу мәселесін шешу тек мемлекеттік органдар тарапынан ғана емес, қызметкерлердің де белсенді қатысуын талап етеді. Мемлекеттік қызметшілердің өз құқықтары туралы білуі және оларды белсенді қорғауы маңызды”, – дейді департамент басшысы.
Бұдан бөлек биылғы 9 айда облыстың мемлекеттік әкімшілік қызметшілеріне 458 тәртіптік жаза қолданылған. Оның 356-сы жергілікті атқарушы органдарға, қалғаны аумақтық мемлекеттік органдарға қатысты.
“Тәртіптік жаза қолдану рәсімі Қазақстан Республикасы Президентінің 2015 жылғы 29 желтоқсандағы №152 Жарлығымен бекітілген және мемлекеттік қызметшілерге тәртіптік жаза қолдану қағидаларымен регламенттелген. Зерттеу және талдау материалдары ретінде тоқсан сайын мемлекеттік органдар ұсынатын есептер қолданылады. Мемлекеттік қызметшілерге қатысты ең жиі кездесетін заң бұзушылықтарға тоқталсақ, оларға тәртіптік жаза қолдану мерзімдерін бұзу және қызметтік тергеу рәсімін жүргізбеу жатады. Биылғы 9 айдың қорытындысы бойынша департамент тәртіптік жаза қолдану туралы 15 актінің күшін жойды”, – дейді Ержан Қарымсақов.
Маманның айтуынша, тәртіптік жауапкершілікке тарту кезінде мемлекеттік қызметшілердің құқығын бұзу фактісі сараланады, департамент оны қалпына келтіру үшін барлық шараларды қабылдайды.
Ақерке ДӘУРЕНБЕКҚЫЗЫ,
“Soltüstık Qazaqstan”.