Жақында Бурабайда “Әке – отбасының тірегі” атты IV республикалық әкелер форумы өтті. Онда әке беделін арттыру, балалардың бойында патриотизм мен адамгершілік-рухани құндылықтарды қалыптастырудағы әке рөлі тақырыбында ой-пікірлер айтылып, отбасы институтын нығайту жолдары сараланды. Белсенді азаматтар отбасының беріктігін сақтауда өз тәжірибелерімен бөлісе келе, жастардың санасына отбасы туралы құндылықтарды, оның қадір-қасиеті туралы мағыналы дүниелерді көбірек сіңіру керектігіне тоқталды.
Бүгінгі таңда елімізде 2030 жылға дейінгі отбасылық және гендерлік саясат тұжырымдамасының бірінші кезеңі іске асырылуда. Тұжырымдамада бала тәрбиесіне қатысты ата-ананың жауапкершілігін арттыру, соның ішінде әкелер институтын дамыту және үлгілі отағасыларды насихаттау мәселесі алға қойылған. Осы мақсатта елімізде 70-тен астам белсенді әкенің басын бір арнаға тоғыстырған “Әкелер одағы” қоғамдық бірлестігі құрылды. Оның мүшелері форум барысында аталмыш мәселе төңірегінде жүргізген зерттеулерін таныстырды. Мәселен, өңірлерде әкелердің алимент төлемеуі, бала тәрбиесіне немқұрайды қарау фактілері жиі кездескен. Форум қатысушыларының пікірінше, мұндай жағдайдың қалыптасуына көбінесе нәзік жандардың өздері кінәлі. Жиынға қатысқан психолог Жанар Талдыбаева ерлі-зайыптылар отбасындағы өз орнын анықтап алмай, үйде үйлесімділік пен тұрақтылық орнамайды деген пікірде. Өкінішке қарай, соңғы уақытта отбасындағы әкелер рөлі төмендеп кетті, бала тәрбиесі тек әйелдің ғана шаруасы сияқты көрінеді, ер адамдар бұл істен сырт қалып жатады. Ал бұл өз кезегінде жас жігіттердің өз жауапкершілігіне жүрдім-бардым қарауына әкеліп соқтырады. Соның салдарынан бүгінде көптеген қыз-келіншектер балаларын жалғыз өздері тәрбиелеп отыр. Бала үйінде анасының тәрбиесін алады, мектепте тағы да әйел мұғалімнің өнегесін көреді. Осыдан барып қыз мінезді, қиындыққа шыдамай морт сынатын ынжық бозбалалар көбеюде. Статистикалық мәліметтерге назар аударсақ, қыздарға қарағанда суицид фактілері ер балалардың арасында жиі кездесіп отырғаны да ойландырмай қоймас.
Жиын барысында біздің өңірдің өкілдері бала бойындағы тұлғалық қасиеттерді қалыптастыруда әкенің рөлі жоғары екенін алға тартты. Сонымен қатар әріптестерімнің пікірінше, бала тәрбиесінде, отбасының мықты болуында ата-әжелердің алар орны ерекше. Форумда айтылған осы және өзге де мәселелерді қамтып, алдағы күндері “Парасат” мектеп-лицейінде әкелер форумын өткізуді жоспарлап отырмыз. Бүгінгі жас ұрпақ ертең елдің тізгінін ұстайтынын ескеретін болсақ, бала тәрбиесі, отбасы мәселесі сияқты тақырыптар күн тәртібінен түспеуі тиіс. Әкелер форумында отбасында, қоғамда жақсы істерімен көзге түскен ер-азаматтарды таныстырып, алдағы уақытта олардың қатысуымен түрлі семинарлар өткізбекпіз.
Қалел МӘДЕНОВ,
“Парасат” мектеп-лицейі
жанындағы әкелер
одағының төрағасы.