Қызылжар ауданының орталығы – Бескөлде «Ауыл» халықтық-демократиялық атриоттық партиясының 25 жылдығына орай ерекше іс-шара өтті. Орталық алаңда тұрғындарға 1000-нан астам қаз балапаны тегін таратылды.
Бұл акция ауыл тұрғындарына нақты көмек көрсету, ауыл кәсіпкерлігін дамыту және өңірдің азық-түлік қауіпсіздігін нығайту мақсатында ұйымдастырылды.
Жергілікті тұрғындар бұл бастаманы қуанышпен қарсы алып, шараға белсене қатысты. Ұйымдастырушылар тарапынан ауыл шаруашылығымен айналысқысы келетіндерге арналған пайдалы кеңестер мен практикалық ұсыныстар берілді. Сонымен қатар қаз шаруашылығын жүргізудің қыр-сырымен танысуға мүмкіндік туды.
Іс-шара барысында балалар мен үлкендерге арналған ойын-сауық бағдарламасы ұйымдастырылып, ауыл жұртшылығы бір серпіліп қалды.
«Ауыл» партиясы ауылды жерлердің әлеуметтік-экономикалық әлеуетін арттыру жолында нақты әрі нәтижелі істер атқарып келеді. Бұл жолғы бастама – соның бір айғағы. Шара соңында тұрғындар партияға алғыс білдіріп, мұндай игі істер жалғасын табатынына сенім артты.
Ләзиза МЫРЗАНТАЙҚЫЗЫ,
«Soltüstık Qazaqstan».