Петропавлда облыстық ардагерлер кеңесінің кеңейтілген төралқа отырысы өтті. Жиында кеңестің 2024 жылы атқарған жұмыстары қорытындыланды. Іс-шараға қоғамдық және мемлекеттік мекемелердің, саяси партиялардың өкілдері, жастар қатысты.
Облыстық ардагерлер кеңесі төрағасының орынбасары Анатолий Корабельников өз сөзінде өткен жылы ардагерлер ұйымдарының әскери-отаншылдық және әлеуметтік жобалары сәтті жүзеге асырылғанын айта келе, жұмысты ұйымдастыру мен жоспарлауға жаңа көзқарас қажет екенін айтты.
Жиналғандарды ұйымның 2025 жылға арналған кешенді жұмыс жоспарымен таныстырған облыстық ардагерлер кеңесі төрағасының орынбасары Бейбіт Әбілев Ұлы Отан соғысындағы Жеңістің 80 жылдығын мерекелеу бағытындағы шараларға баса көңіл бөлінетінін айтты. Осы мақсатта Аққайың және Мамлют аудандарындағы ардагерлер ұйымдарының тәжірибесін зерделеу жоспарлануда.
Отырысқа қатысушыларды Айыртау аудандық ардагерлер кеңесінің төрағасы Серікбай Тұралинов Жеңістің 80 жылдығын мерекелеуге дайындық барысы туралы хабардар етті. Осы мәселе бойынша қабылданған қаулыда Айыртау ауданындағы қаза тапқан жауынгерлердің ескерткіштерін күтіп- жөндеу жұмыстарын ұйымдастырудың озық тәжірибесі атап өтілді.
Шарада облыстық ардагерлер кеңесінің мамандары «Ауыл» халықтық-демократиялық патриоттық партиясы» облыстық филиалымен бірлесе өткізген «Батаменен ел көгерер» атты байқаудың қорытындысын жариялады. Байқау жеңімпаздарына марапаттар табыс еткен облыстық ардагерлер кеңесінің төрағасы Ескендір Елеусізов ақсақалдардың бата беру өнерін насихаттау аясындағы істеріне сәттілік тіледі. Өңірдегі ардагерлер қозғалысына қосқан елеулі үлесі үшін Серікбай Тұралиновқа «Солтүстік Қазақстан облысының құрметті ардагері» төсбелгісі, ал Вера Горкунға облыстық ардагерлер кеңесінің Құрмет грамотасы табысталды. «Белсенді ұзақ өмір сүру орталығының» басшысы Лидия Грабарь Алғыс хатпен марапатталды.
Рабиға ЕРАЛЫ,
«Soltüstık Qazaqstan».