Петропавлдағы №28 мектепте қазақтың ұлттық ойыны – тоғызқұмалақтан облыстық жарыс өтті. Оған облыс орталығы мен аудандардан іріктелген 5-11 сынып оқушылары қатысты.
Тоғызқұмалақ – ақыл-ойды дамытуға арналған ойын. Әлемдік интеллектуалдық ойындардың озық үлгілерімен бой теңестіре алатын ол логикалық ойлауды талап ете отырып, адам санасын жетілдіруге ерекше күш салады. Өткен ғасырларда қазақ даласындағы ең кең тараған ойынның шығу тарихы кей деректерде 4 мың жылдық кезеңді қамтиды десе, кейбір мамандардың айтуынша, оның пайда болған кезі бұдан да көп уақыт болуы әбден мүмкін.
Тоғызқұмалақ ойыны соңғы уақытта қарқын алып, күннен күнге танымал болуда. Облыс көлеміндегі спорттық шара ұлттық ойынның беделін арттыру, қатысушылардың шеберлігін шыңдау мақсатында ұйымдастырылған. Жарыс 5 кезеңнен тұрды. Оған 11 команда қатысты. Тоғызқұмалақтан аға жаттықтырушы Мейрамбек Утеновтің айтуынша, бұл ойынға деген жастардың қызығушылығы артып, жарысқа қатысатын оқушылар саны көбейіп келеді.
– Барлық бапкерлер шәкірттерін жақсы даярлағаны байқалады. Қатысушылар саны 100-ден асады. Балалардың арасында бәсекелестік жоғары. Ойын өте тартысты өтті. Ойыншылардың логикалық ойлауы, тапқырлығы мен шыдамдылығы ерекше байқалды. Маусым айында Қостанай қаласында Қазақстан чемпионаты өтеді. Енді соған қызу дайындаламыз, – дейді бас төреші Мейрамбек Утенов.
2023 жылы облыс тарихында тұңғыш рет тоғызқұмалақтан республикалық жастар және жас- өспірімдер арасында командалық чемпионат өткені белгілі. Сол жылдың қорытындысы бойынша осы спорт түрінен «Ең үздік аймақ» атанған болатынбыз. Осы қарқыннан таймасақ, ұлтымыздың адамзаттың мәдени мұрасына қосқан үлесінің жарқын үлгісі саналатын тоғызқұмалақтың ілгері дамитынына шүбә жоқ.