Есіл өзенінің жағалауында аңшылар мен балықшыларға қауіпсіздік ережелерін түсіндіру мақсатында кезекті рейд өтті. Оның барысында облыстық төтенше жағдайлар жөніндегі департаменттің “Өрт сөндіру және апаттық-құтқару қызметі” коммуналдық мемлекеттік мекемесінің мамандары бос уақытта кәсіптің осы түрімен айналысатын адамдарға сақтық шараларын үнемі есте сақтаудың маңыздылығы туралы айтып, парақшалар таратты.
– Осындай тексеру шаралары барысында біздің бөлімшенің қызметкерлері өңірдің су қоймаларында күн сайын 10-ға жуық балықшыны кездестіреді. Өкінішке қарай, олардың көпшілігі қарапайым қауіпсіздік ережелерін білмейді. Сонымен қатар әуесқойларда төтенше жағдай кезінде оларды құтқаруға арналған арнайы киімдер мен дөңгелектер болмайды, – дейді сүңгуір-құтқару бөлімшесінің бастығы, құтқарушы Қайрат Самаев. Облыс құтқарушылары аңшылар мен балықшыларға сақтық қағидаларын әрдайым қаперде ұстауға және оқыс оқиға орын алған жағдайда дереу “112” нөміріне хабарласуға кеңес береді.