Айыртау ауданындағы бір ауылда өзін балгермін деп таныстырған алаяқ әйел 81 жастағы қарияның ақшасын ұрлаған.
Облыстық полиция департаменті баспасөз қызметінің мәліметінше, белгісіз әйел ауыл тұрғынының есігін қағып, бал ашып беруді ұсынған. Зейнеткерді алдап-сулап, оның жиған-терген 400 мың теңгесін қалтасына басқаннан кейін ізін суытқан. Күдікті Мамлют ауданында қолға түсті. 1983 жылы туған ресейлік азамат өз кінәсін мойындап, зейнеткерден кешірім сұрады, ақшасын толық қайтарды. Дегенмен, оның заң бұзушылығы жауапсыз қалмай, соттың үкімімен ел аумағынан шығарылды.
Жыл басынан бері облыста алаяқтыққа қатысты 178 қылмыс тіркелсе, соның 110-ы ашылды.