Елдегі төтенше жағдайға және коронавирустың таралу қаупіне қарамастан, жолсеріктер пойызға билетсіз жолаушыларды алу арқылы пайда табудан тиылар емес. Бұл жайында “Qyzyljar – adaldyq alańy” жобалық кеңсесінің онлайн режімде өткізген баспасөз мәслихатында айтылды.
“Құпия сатып алушылар” “Qyzyljar – adaldyq alańy” жобалық тобымен бірлесіп, Петропавл вокзалында жолсерікке қолма-қол ақы төлеп, билетсіз Алматы мен Көкшетауға жетуге келісті.
– “Құпия сатып алушының” №706 пойыз вагондарының жолсеріктерімен әңгімесі барысында Көкшетауға дейін 5000 теңгеге, ал Алматыға дейін 15000 теңгеге билетсіз жету мүмкіндігі бар екендігі белгілі болды, – деді жобалық кеңсенің жетекшісі Амангелді Сатанов.
Осылайша, “құпия сатып алушы” ешбір құжатсыз және билетсіз №706 “Тальго” жүрдек пойызымен Алматыға дейін жететін болды. 20000 теңге сұраған жолсерік өзінің сыбайласымен ақылдаса келе 15000 теңгеге келісті.
Мұнымен қоса белсенділер Қызылорда бағытына бет алған №076 пойызының қызметкерлерімен де еш қиындықсыз 10000 теңгеге келісе алды. Мұнда алдыңғы жайттарға қарағанда жолсерік жеке куәліктің суретін сұрады, тек содан кейін ғана жолаушыны өзімен алуға ниет танытқан.
Қоғам белсенділері қазақстандық темір жол компаниялары мен Петропавл вокзалының жұмысына мониторинг жүргізу барысында делдалдарды кездестірмеді.
Көліктік бақылау инспекциясы бөлімінің басшысы Манарбек Ибраевтың айтуынша, темір жол вокзалында тексерістер тұрақты жүргізіледі екен. Үстіміздегі жылдың басынан бері “Адал жол” жобасын іске асыру аясында 17 пойыз тексеріліп, билетсіз 15 жолаушы анықталды. Жолаушылар мен жол жүгін тасымалдау ережесін бұзу бойынша 11 әкімшілік хаттама толтырылып, 84832 теңге көлемінде айыппұл салыныпты.
Сондай-ақ, билетсіз жолаушы тасымалы үшін әкімшілік жауапкершілікке тек жолсерік тартылады екен. Ал заңсыз отырған жолаушыны билет сатып алу үшін келесі станцияда түсіреді.
Жан АЙТМАҒАНБЕТОВ,
Сыбайлас жемқорлыққа қарсы іс-қимыл агенттігі облыстық департаментінің баспасөз хатшысы.
Сурет https://4news.kz/ сайтынан алынды.