ХХ ғасыр өнеркәсіптің қарқынды дамуымен және халық санының өсуімен сипатталса, ХХІ ғасырдың басында қоршаған ортаны ластайтын өнеркәсіптің кейбір салалары таза суға, өсімдіктерге және т.б. зиянын тигізе отырып, жылдамдықпен дами бастады. Адамзаттың бүгінгі іс-әрекеті, күнделікті тіршілік жерге, ауаға, суға орны толмас залал келтіруде. Адамның табиғатқа әсер етуі оның өзінің өміріне де қауіп төндіреді. Бабаларымыз “Су – тіршілік көзі” деп бекер айтпаған. Өйткені, адам баласының күнделікті тіршілігін сусыз елестету мүмкін емес. Бүгіндері әлемде сапалы ауызсу тапшылығы анық сезілуде.
Тәуелсіз елімізде, оның бір бөлшегі болып табылатын біздің Қызылжар өңірінде бұл мәселе өз шешімін тауып келеді. Облыс орталығындағы іргелі кәсіпорындардың бірі – “Қызылжар су” жауапкершілігі шектеулі серіктестігі Петропавл қаласының тұрғындарын сапалы ауызсуымен және қаланың техникалық қажеттіліктерін қамтамасыз етіп отыратын ірі мекеме. Оған су таратқыш құрылғылар, бірінші және екінші көтерілімдегі сорғыш станциялары, су жарқыратқыш, фильтрлік, зарарсыздандырғыш құрылғылар мен зертханалар, су құбыры жүйесі, сорғы станциялары мен басқа да техникалық және шаруашылық нысандар сияқты ірі көлемді техникалық база кіреді.
Бір ғасырдан астам тарихы бар “Қызылжар су” жауапкершілігі шектеулі серіктестігі қала тұрғындары мен мекемелерін орталықтандырылған сумен жабдықтау және кәріз қызметтерімен қамтамасыз ету бойынша жұмыстардың толық кешенін жүзеге асырады, аулалық жүйелер кәріздік коллекторларға, ағынды сулар жинақтаушы бөгеттеріне, кәріздік тазартқыш құрылғыларға қызмет көрсетеді.
Қалаға тазартқыш ғимараттардан су Солтүстік-Батыс, Дзержинск, Октябрь, Оңтүстік-Батыс, 20 шағынауданындағы магистральдық жолының бойымен суағарлар арқылы келеді. Барлық қаланың сумен жабдықталуы жылына бір рет күз айларында тоқтатылып, сумен жабдықтаудың тиімділігін жоғарылату үшін барлық желілерге жуу мен дезинфекция жүргізіледі. Ағынды сулардың рұқсатнамасымен кәрізді желілердің учаскелері шұғылданады.
Бүгіндері біздің кәсіпорын қаламыздың маңызды және ажырамас инфрақұрылымына айналған. Үстіміздегі жылдың тоғыз айында қаламыздағы барлық тұтынушыларға 9 миллион текше метр су жеткізілді, бұл былтырғы сәйкес мерзімге қарағанда 0,1 пайызға жоғары көрсеткіш. Біздің ұжым қызметкерлері 86 мың абонентке, үш мыңға жуық кәсіпорындар мен мекемелерге су жеткізу жұмысымен айналысады. Сонымен қатар, 326 километр ішкікварталдық, бөлу және магистральдық су құбырларына қызмет көрсетіледі.
“Қызылжар су” жауапкершілігі шектеулі серіктестігі су жеткізумен айналысатын монополист кәсіпорын ғана емес, мемлекетке нақты табыс әкелетін бизнес-құрылымға айналуда. Бұл игі іс кәсіпорын тарихында бірінші рет қолға алынып отыр. Үстіміздегі жылдың тоғыз айындағы операциялық табысымыз 101,9 миллион теңгеге жетті. Кәсіпорын қызметкерлері қол жеткізген табыстарды тұрақты ету жолында аянбай еңбек етуде. Біз қазір алдымызға су құбырларындағы апаттар санын барынша азайтуға, жыл сайын тозығы жеткен 15 километр құбырды жаңасына ауыстыруды мақсат етіп қойып отырмыз. Бұл ойымыз жүзеге асса, 2025 жылы қаламыздағы барлық су құбырлары жаңартылатын болады.
Алға қойған мақсатты жүзеге асыру үшін кәсіпорын судың шығынын есептейтін және сорғы агрегаттарының жиілікті реттейтін осызаманғы аспаптарын орнату жолымен магистральды су құбырларын қайта құру бойынша ұзақ-мерзімді инвестициялық бағдарлама жасады. Бұл бағдарлама 2016-2021 жылдары жүзеге асырылуы тиіс. Жобаның құны – 7,5 миллиард теңге. Биыл екінші көтерілімдегі сорғы станциясын қайта құру жұмыстары қарқынды жүргізілді. Жоспарға сәйкес энергиялық тиімді үш сорғы агрегаттары орнатылды. Сондай-ақ, диаметрі 800 миллиметрлік Оңтүстік-Батыс тазалау ғимараттарынан бірінші көтерілімдегі сорғы станциясына дейінгі су құбырларына қайта құру жүргізілді.
Кәсіпорын қызметіндегі басты бағыттардың бірі су желісіндегі барлық кешеннің қауіпсіз жұмысын қамтамасыз ету болып табылады. Өндірістік қуаттарды жаңғырту, орындаушылық және технологиялық тәртіпті нығайту арқылы кәсіпорын 19 кәріздік сорғы станциялары қондырғыларын алмастыру бойынша оң серпінге қол жеткізуде. Инвестициялық бағдарламаға сәйкес Қ.Сәтбаев және Қ.Кеншінбаев көшелеріндегі кәріздік сорғы станциялары толық қайта жаңғыртылды, қаламыздың басқа шағынаудандарындағы алты сорғы станциясының технологиялық қондырғылары алмастырылды. Осы станциялардағы қауіпті процестер толық автоматтандырылды, апатты жағдайларға душар еткізетін адами факторлардың болмауы қарастырылды.
“Нұрлы Жол” мемлекеттік бағдарламасы аясында санация әдісімен Пушкин көшесінде кәріздік коллекторды қалпына келтіру жөніндегі жұмыстар аяқталды. Бұл бағыттағы жұмыстар Шухов пен Заводская көшелерінде жалғасып жатыр.
Су өткізгіш-кәріздік шаруашылығының барлық қызметтері жедел жұмыс жасауы үшін диспетчерлік қызметтеріміз тындырымдылық танытуда. Кәсіпорында азаматтардың тұтынушылар ыңғайлылығы үшін тұрғындарға қызмет көрсету орталығы ашылды, онда кез келген қызмет үшін төлемақы төлеп, су есептегіштерін тексертіп, техникалық шарт ала алады.
Мекеменің автокөлік паркінің жаңартылуы жалғасуда. Жаңа шынжыр табанды “Komatsu” тракторы сатып алынды, ол қыстың қатал ауа райында жұмыс істей алады. Екі “Komatsu-WB” жүк артушы-экскаваторы, сумен жабдықтау және суды бөлу кешенінің зертханасына қызмет көрсету үшін 2 шағынавтобус, “ПАЗ” автобусы, жоғары қысымды коллекторларды жууға арналған құрылғысы бар жуғыш машина, екі апаттық машина, ауыр техниканы тасымалдауға арналған трал және басқа да техникалар тұтынушыларға сапалы қызмет көрсетуге септігін тигізуде. Осындай жұмыстардың нәтижесінде пайдалану шығындарын азайту бойынша оң экономикалық тиімділікке, ең бастысы, қаладағы тұтынушыларымызға суды жеткізуде сенімділікке қол жеткізудеміз.
“Қызылжар су” жауапкершілігі шектеулі серіктестігінде бір мыңға жуық адам еңбек етеді, бұл – қаламыздағы қызметкерлер саны бойынша төртінші ірі кәсіпорын. Оның тиімді жұмыс істеуіне кәсіпорынның партия, кәсіподақ ұйымдары мен қоғамдық келісім кеңесі ықпал етуде десек қателеспеспіз. Кәсіпорын қызметкерлерінің үштен бірі “Нұр Отан” партиясының мүшелері болып табылады. Биылғы наурыз айында қаржылық директор Ержан Бәженов Петропавл қалалық мәслихатының депутаты болып сайланды.
Үстіміздегі жылдың сәуір айынан кәсіпорын ұжымы мақұлдаған және сайлаған қоғамдық келісім кеңесі жұмыс істей бастады. Бұл кеңес әкімшілік пен ұжымның мүдделерін үйлестіретін қоғамдық ұйым ретінде өзін жақсы қырынан көрсете білуде. Оның отырыстарында бюджеттік бағдарламаларды жүзеге асыру барысы қаралып, учаске басшыларының өндірістік және еңбек тәртіптерінің жағдайы туралы есептері тыңдалды. Жуырда кәсіпорынның 115 жылдығына орай мұражай ашылмақ.
Биылғы қазан айынан бастап “Қызылжар су” жауапкершілігі шектеулі серіктестігінде мамандығы бойынша үздіктерді анықтайтын конкурс өткізу дәстүрін қайтадан жаңғырттық. Конкурстық комиссияның шешімімен ең үздіктер марапатталды. Владимир Акимов – кәсіпорынның үздік электромонтері, Меруерт Хусаинова – үздік зертханашы, Вадим Ягодин – сумен жабдықтау кешені апаттық-қалпына келтіру жұмыстарының үздік слесары, Борис Приказчиков – үздік автобус жүргізушісі, Қадыржан Қабденов – үздік газбен және электрмен дәнекерлеуші, Юрий Бородин – үздік токарь, Владимир Ефанов су бөлу кешені апаттық-қалпына келтіру жұмыстарының үздік слесары болып танылды.
Қоғамдық келісім кеңесінің отырысында “Қызылжар су” жауапкершілігі шектеулі серіктестігі өндірістік-еңбек ұжымдарының үстіміздегі жылдың тоғыз айындағы жарысының қорытындысы шығарылды. Кәсіпорын бөлімшелерінің жұмысын бағалау кезінде кадр тұрақтылығы, қауіпсіздік техникасы және еңбекті қорғау ережелерін сақтау, жөндеу қорының игерілуі, есепті уақтылы беру сияқты өлшемдер есепке алынды. Кәсіпорындағы он үш өндірістік-еңбек ұжымдары арасында Сергей Лошаков басқаратын кәріздік желілер учаскесі бірінші орын алды.
Қараша айында біз қайырымдылық акциясын өткіздік. Кәсіпорынның қызметкерлері аз қамтылған отбасылардың және мүгедек балалардың киім мен аяқкиім сатып алуларына 425 мың теңге жинап, тапсырды. Еңбек ұжымы қаламызда өтетін қоғамдық-бұқаралық шараларға белсене қатысады. Біздің кәсіпорынның бастамасымен жалпықалалық “Судың сапасы және оны үнемдеу жолдары” тақырыбында ғылыми-тәжірибелік конференция өтті.
“Қызылжар су” жауапкершілігі шектеулі серіктестігінің ұжымы Мемлекет басшысының Қазақстан халқына Жолдауларында атап көрсетілген өндірісті жаңғырту және инновациялық технологияларды енгізу бағытындағы айқын міндеттерді орындау жолында бар мүмкіндіктерін пайдалануда. Тәуелсіздік жылдары біздің кәсіпорын елімізбен бірге өсу-өркендеу жолынан өтіп келеді. Бүгіндері бүкіл еліміздің аумағында “Ұлы Дала елі – Тәуелсіздіктің 25 негізі” атты 25 жұлдызды күн акциясы өтіп жатыр. Тәуелсіздік жылдары қол жеткен жарқын істерді көрсететін бұл игілікті іс-шараларға біздің еңбек ұжымымыз да белсене қатысуда.
Жеңіс СҰЛТАНОВ,
“Қызылжар су” жауапкершілігі шектеулі
серіктестігінің бас директоры.