Бразилияның астанасы – Бразилиада дзюдодан өткен “Гранд Слэм” турнирі өз мәресіне жетті.
Осы жарыста жанкүйерлер әйгілі француз балуаны Тедди Ринердің татамиге оралуын тағатсыздана күтті. Лондон мен Рио Олимпиадасының жеңімпазы, Бейжің Олимпиадасының қола жүлдегері, әлемнің 11 және Еуропаның 5 дүркін чемпионы біраз уақыттан бері көрінбей кеткен еді. Ұзақ жылдар бойы әлемдік рейтингте көш бастаған даңқты балуан бұл жолы Бразилияда бой көрсетті. Қарсы келгендердің барлығын жеңген Тедди Ринер аса ауыр салмақтың бас жүлдесін олжалады.
Жартылай финалда Францияның алыбы биылғы жылғы әлем чемпионы, чехиялық Лукаш Крпалектің өзін қапы қалдырғанын атап өткен жөн.