Мәнерлеп сырғанаудан АҚШ-тың Бостон қаласында жалауы желбіреген әлем чемпионатында отандасымыз Михаил Шайдоров тамаша өнер көрсетіп, күміс медаль жеңіп алды. Өз композициясын сәтті орындап шыққан жерлесіміз 287,47 ұпай жинады.
Бостонда өткен дүбірлі додаға жер- жаһанның барлық мықты мәнерлеп сырғанаушылары қатысты. Жарыс жолына шыққандардың дені – Олимпиада мен әлем чемпионаттарында атой салған саңлақтар. Халықаралық, құрлықтық жарыстарда жеңіс тұғырына көтерілгендердің қарасы тіптен көп.
Осы күнге дейін еліміздің мәнерлеп сырғанаушылары әлем чемпионаттарында үш рет жеңіс тұғырына көтерілген еді. Алғашқы екі жүлдені марқұм Денис Тен иеленген. Ол 2013 жылы Лондонда күміс алса, 2015 жылы Шанхайда қолаға қол созды. 2019 жылы Қытайда Элизабет Тұрсынбаева шеберлігімен тәнті етіп, күміспен күптелді. Енді міне 20 жастағы Михаил Шайдоров еліміздің мерейін өсіріп, абыройын асқақтатты.
Жарыс аяқталған бетте БАҚ өкілдеріне сұхбат берген әлемнің вице-чемпионы: «Мұз айдынына шыққанда медаль туралы еш ойлаған жоқпын. Тек қана дүйім жұрттың алдында өзімнің шынайы мүмкіндігімді көрсетіп, сырғанаудан ләззат алғым келді. Осы еркіндік, өз-өзіме деген сенімділік мені жеңіс тұғырына жетеледі», – деп ақтарыла сөйледі.