БОС ҒИМАРАТ МЕШІТКЕ АЙНАЛАДЫ

Тәуелсіздік жылдары елімізде жамағатты із­гілік пен мейірімнің шуағына бөлейтін көп­теген мешіттер бой көтерді. Дегенмен, әлі де Алла үйі салынбаған, бірақ жүректері иманға толы тұрғындары бар ауылдар аз емес. Қызыл­жар ауда­нындағы Архангелка ауылында асыл діні­міз­дің қадір-қасиетін түсінетіндер саны жыл санап артуда.

Архангелка күрежолдың бойында, Пет­ро­павл қаласынан қырық шақырым қашық­тықта орналасқан. Ауыл молдасы Баяхмет Жама­лиев­тың айтуынша, іргесі сөгілмеген елді ме­кен тұрғындарының тұрмысы соңғы жылда­ры біршама көтерілген. Ауылдың ба­йырғы тарихи келбетін сақтап, бұрыннан қа­лыптас­қан үрдіспен жұмыстарын жалғас­ты­румен қа­тар, жаңашылдық көшінен қал­мауд­ы мақ­сат еткен. Бір өкініштісі, елді ме­кенде шіркеу бол­ға­нымен, мешіт үйі жоқ. Имандылық ордасын салу мәселесі бірнеше жылдан бері күн тәртібінде тұр.
Көпжылғы армандарын жүзеге асыруды ал­­дына мақсат етіп қойған ауыл тұрғындары қа­ңырап бос тұрған “Қазпошта” АҚ-ы облыстық филиалының ғимаратын аукцион арқылы сатып алып, жөндеу жұмыстарын жүргізген. “Көп түкірсе – көл” деп бекер айтылмаған ғой. Алыс-жақын ағайынның, жергілікті тұр­ғын­дардың асарымен ғимараттың іші-сырты сы­ла­нып, есік-терезелері ауыстырылған. Тозы­ғы жеткен шатыры да жөнделіпті. Ал­дағы уа­қытта күмбезін орнату жұмыстары қол­ға алын­бақ. Мұнда мінәжат етуге қажеттінің бә­рі бар. Тек құжаттарды рәсімдеу ке­шік­тірілуде. “Қазпошта” АҚ-ы құра­мына кіретін “Самұрық-Қазына” Ұлттық әл-ауқат қоры” ак­ционерлік қоғамы басшылығының оң ше­шімін тосып отыр.
Жергілікті жамағатпен кездесуге арнайы келген Петропавлдағы 20 шағынауданындағы қала­лық мешіттің бас имамы Қасымхан Исаевтың ай­туынша, “Діни қызмет және діни бірлестік­тер туралы” қабылданған заң діни қыз­меткер­лер­дің жаңа талаптармен жұмыс іс­теуіне жол ашу­мен қатар, мешіттердің тек бір ор­та­лық­тан басқарылуына мүмкіндік бе­реді.
– Ғибадатханалар – қала мен ауылдың көр­кі, тәрбиенің ұстаханасы. Мешіт жамаға­ты­мен көрікті. Оның құжаттары да талаптарға сай болуы ке­рек. Яғни, ғибадат үйінің мем­лекеттік жер ак­ті­сі мен ғимараттың құжатта­ры толық рә­сім­делуі міндетті. Кейін Қазақ­стан мұсылман­да­ры діни басқармасының филиалы ретінде об­лыстық әділет департа­ментінен тіркеуден өт­кізілуі қажет, – деген Қасымхан Абдулла­ұлы жұртшылыққа түрлі діни шараларды өт­кізудің тәртібін де түсіндірді.
Дін өкілінің айтуынша, Тәуелсіздіктің алғашқы жыл­дары елімізде 60-қа жуық мешіт болса, бү­гінгі таңда қазақстандықтарға үш мыңға жуық Ал­ла үйі қызмет көрсетуде.
 

Қанат АТАМАНОВ,  “Soltústik Qazaqstan”.