Өңір басшысы Ермек Маржықпаев бастаған ақмолалық делегация Ресейдің Омбы қаласында «Қазақстан мен Ресейдің шекаралық әріптестігін дамытудың өзекті мәселелері» атты 16-шы өңіраралық әріптестік форумына қатысты.
Форумда «жасыл экономиканы» дамыту және өңірге инвестиция тартуды дамыту аясында Ақмола облысының әкімі Ермек Маржықпаев пен Ресейдің «ХЕВЕЛ» компаниясының «Авелар Солар Технолоджи» ЖҚБ бас директоры Игорь Шахрай арасында қуаты 100 МВт болатын күн электр стансасын салу туралы келісімшарт жасалды. Электр стансасы 2020 жылы іске қосылған кезде энергия өндірісінің үлесі 40 пайызға артады, сондай-ақ, қоршаған ортаға газдардың бөлінуі азаятын болады. Сонымен қатар, Ақмола облысының кәсіпкерлік және өнеркәсіп басқармасы мен Омбы облысының өнеркәсіп, байланыс, цифрлық және ғылыми даму министрлігі арасында екжақты әріптестік туралы меморандумға қол қойылды. Екі облыс арасындағы келісім кәсіпорындар арасында сауда және экономикалық байланысты нығайтуға мүмкіндік бермекші. Екіжақты туризмді дамытудың жолдары кеңінен талқыланды. Жаңа туристік өнімдер енгізу және аталмыш саланы дамыту бойынша шараларды бірлесіп жүзеге асыру туралы «Visit Aqmola» туристік ақпарат орталығы мен «Қазкурорт» жауапкершілігі шектеулі қауымдастығы арасында меморандумға қол қойылды. Бұдан бөлек ресейлік туроператорлармен Ақмола облысының Бурабай және Зеренді курорттарына ресейлік туристерді тарту туралы мәселе талқыланды. Кездесуде айтылғандай, Бурабай курорты соңғы 10 жыл ішінде ресейліктер үшін үздік бестіктің қатарында. Росстат деректеріне сүйенсек, өткен жылы Бурабай курорты Ресей туристерінің арасында ТМД аумағындағы ең танымал курортар тізімін бастаған.
www.inform.kz