Облыстық қуыршақ театры отызыншы маусымды тұңғыш рет қазақ тілінде “Сақ болыңдар, бауырсақтар” атты ертегімен ашты. Қойылымды алғашқылардың бірі болып “Алтын бесік” және “Салтанат” балабақшаларының тəрбиеленушілері тамашалады.
Аталмыш спектакль орыстың “Колобок” ертегісі желісімен жазылған. Қуыршақ театрының көркемдік жетекшісі Мейрам Сексенбаев туындыны қазақ тіліне аударып, Ресей режиссері Андрей Мелентьевпен бірлесіп əзірлеген. “Бәрімізге белгілі ертегіде бір ғана бауырсақ болса, біздің қойылымда олар – екеу. Атасы мен əжесінен қашқан бауырсақтар түрлі оқиғаларға тап болады. Жол бойы аңдармен тілдесу кезінде көп ой түйіп, өз қылықтарына қатты өкінеді. Қойылымның тәрбиелік мәні зор”, – дейді Мейрам Сексенбаев.
Басты рөлді сомдаған театрдың жас актері Нұрсұлтан Қалқабек образды балаларға түсінікті етіп жеткізуге тырысқан. Сахна иесінің пікірінше, қойылым балаларға шынайы болып көрінгенде ғана олар жақсы әсерге бөленеді.
Спектакльді тамашалаған балалар нағыз достық пен көмек қолын созудың маңызын түсінді. Сондай-ақ, олар қойылым барысында театр ұжымы дайындаған ойындарға қатысып, көңіл көтерді. “Еліміз бойынша бүлдіршіндерге арналған мұндай өнер ордаларының санаулы екенін білемін. Солардың ішінде біздің сүйікті театрымыздың алар орны ерекше. 30-ыншы маусым да қуыршақ театрының ұжымы үшін нағыз шығармашылық табыс пен ізденіске толы болады деген сенімдеміз”, – деді спектакльді балалармен бірге тамашалаған “Алтын бесік” балабақшасының тәрбиешісі Қаламқас Сәбитқызы.
Бүгінгі таңда өнер ордасының репертуарында 70-тен астам спектакль бар. Жыл сайын театр көрермен назарына төрт жаңа қойылым ұсынады. Өнер ордасының биыл бірнеше жаңалығы бар. Театр труппасы екі актермен толығып, гастрольдік сапарларға аттанбақ. Олар қараша айында Ресейдің Омбы қаласында өтетін ынтымақтастық форумы аясында көрші елдің кішкентай көрермендері алдында өнер көрсетпек.
Гүлбике КУБЕНОВА,
“Soltústіk Qazaqstan”.
СУРЕТТЕ: қойылымнан көрініс.
Суретті түсірген
Талғат ТӘНІБАЕВ.