Алаш ардақтыларының іздері сайрап жатқан облыстық «Soltüstık Qazaqstan» газетінің 105 жылдығына орай басылым қызметкерлері Қызылжар ауданында болып, оқырман күнін ұйымдастырды. Аудан орталығы Бескөлдегі Мәдениет үйінде өткен іс-шараға жиналғандар алдымен редакция жанынан ашылған музей жәдігерлерімен танысып, газетте әр жылдары қызмет атқарған қаламгерлердің шығармашылығы туралы деректерге қанық болды.
Биыл өңіріміздегі қазақ баспасөзінің қарашаңырағы, іргетасын Мағжан Жұмабаев, Смағұл Сәдуақасов сынды Алаштың аяулы перзенттері қалап, керегесін Қошке Кемеңгеріұлы, Сәбит Мұқанов, Сафуан Шаймерденов сынды белгілі қаламгерлер керген облыстық басылымның алғашқы санының жарық көргеніне 105 жыл толды. Осынау мерейлі датаға орай ұжым мүшелері өңір аудандарын аралап, жанашыр оқырманмен кездесулер өткізуді қолға алды. Алғашқы сапарымыздың Қызылжар ауданынан басталуы бекер емес. Қызылжар – біздің газетіміздің оқырманы көп шоғырланған, ұлттың үнін ту еткен басылымға жазылушылардың саны жөнінен алда тұрған аудан.
Іс-шараны айтыс ақыны Қабдолла Бейісхан мағыналы шумақтармен өрілген арнауымен бастады. Содан кейін Қызылжар аудандық әкімдігі аппаратының басшысы Амангелді Ахынов сөз алып, жиналғандарды басылымның мерейтойымен құттықтады. «Газет – халықтың үні. Өңір тарихы қатталған басылымды қолдау жұмыстары еш бәсеңдемек емес. Газет оқырманының санын көбейту ісіне өз үлесімізді қосатын боламыз», – деді ол.
Баспасөздің ел өміріндегі алатын орны жайлы әйгілі Ахмет Байтұрсынов: «Газет – халықтың құлағы, көзі һәм тілі» депті. Ал неміс философы Артур Шопенгауэр: «Газет – тарихтың секундтық стрелкасы», – деген болатын. Халықтың үні, билік пен бұқараның дәнекері болып келе жатқан басылымдарды қолдау – осы күнгі қазақ баласына да ортақ міндет. Азаматтың мемлекеттік тілге, ұлт руханиятына, Алаш аманатына деген адалдығы алты ай сайын айналып келетін баспасөзге жазылу науқанында анық көрінетінін айтқан «Қызылжар-Ақпарат» ЖШС-ның директоры Ербақыт Амантайұлы поштаның газетті уақытында жеткізу жиілігін сақтамауы мәселесіне баса назар аударды.
«Пошта аудандарға екі, ауылдарға аптасына бір-ақ рет барады екен. Сондықтан 2025 жылдың басынан газет аптасына бұрынғыдай 3 рет емес, 2 рет шығып келеді. Қазіргідей геосаяси ахуал ушығып тұрған сәтте өз идеологиямызды мықтап қолға алуымыз керек. Демек газетті ұлттың тұтастығын сақтау құралы ретінде де пайдаланған артықтық етпейді. Қандай қиын қыстау кезеңде де ұлағатшыл үрдісінен, мемлекетшіл мінезінен таймаған басылым ары қарай да Қызылжар өңірінің рухани ордасы болып қала береді», – деді ол.
«Soltüstık Qazaqstan» газеті заманмен бірге түлеуде. Соңғы жылдары оң өзгерістер жасалып, оқырманға керек дүниелер жарық көріп келеді. Газетіміздің дизайны өзгерді, аудан-ауылдардағы оқырманның мақалаларын жариялауға басымдық берілуде. «Жақсының жары», «Тұтынушы», «Сараптама», «Мәселе» сияқты айдарларымыздың оқырманға берері мол.
Іс-шара барысында оқырманға викториналық сұрақтар қойылып, дұрыс жауап бергендерге сыйлықтар табыс етілді. Газетіміздің жанашырлары Әлім Төлебаев, Жапар Төлегенов пен Уәлихан Қаражігітов сөз алып, төл басылымның орны қашанда төрде екенін шегелеп айтты.
Халық арасында «журналистика – қоғамның барометрі» деген ұғым қалыптасқан. Елің қалай болса, бөркің солай, соңғы уақытта газет-журналдардың таралымының күрт төмендеп кетуі қоғамда оқуға деген құлшыныстың азайғанын аңғартады. Ал керісінше, кітап оқуға, ғылым мен білімге мықтап бет бұрған кейбір елдерде мерзімді басылым миллиондаған таралыммен шығып жатқанының куәсіміз. Қоғам дегеніміз – сіз бен біз. Демек әрқайсысымыз өзімізді түзесек, қоғам да дұрыс бағытқа бұрылатыны – дәлелдеуді қажет етпейтін ақиқат. Жиында оқырман газеттің өткені және қазіргі тыныс-тіршілігі туралы ақпаратқа қанық болып қана қоймай, облыстық Ақан сері атындағы облыстық филармония әртістері мен жергілікті өнерпаздардың әндерін тыңдап, бір марқайып қалды. Дәстүрлі әнші Еркебұлан Қарып «Қазағым» әнін, «Мерей» өнер мектебі жанынан құрылған «Шашу» ансаблі «Терісқақпай» күйін орындап, залда отырғандарды жігерлендірді.
Әрбір басылым өзінің көзі қарақты оқырманымен бай. Ғасырдан астам тарихы бар «Soltüstık Qazaqstan» газетінің орны сол баяғыдай төрде екенін Қызылжар ауданындағы адал оқырманымыз қуаттай түсті.
Самрат ҚҰСКЕНОВ,
«Soltüstık Qazaqstan».
Суреттерді түсірген
Шыңғысхан БЕКМҰРАТ.