Соңғы күндері облыс аумағында 22 оқыс оқиға тіркелсе, екі адам су құрбаны болды. Бұл туралы облыстық төтенше жағдайлар жөніндегі департаментте өткен баспасөз мәслихатында айтылды.
Ведомство бастығының орынбасары Нұрлан Атығаевтың айтуынша, шілде айында күн күрт ысып, су айдындарында орын алған қайғылы оқиғалардың саны өскен.
– Соңғы жеті жылда аса қауіпті су айдындарының тізіміне кіретін Есіл өзені мен Пестрое, Соленое, Лебяжье, Үлкен Тораңғұл, Шалқар, Имантау көлдерінде 180 адам суға кеткен болатын. Өкінішке қарай, 24-і – бала. Дер кезінде көмекке келген біздің мамандар жүзден астам солтүстікқазақстандықты өлім аузынан арашалап қалды. Биылғы суға түсу маусымы басталғалы департаменттің жедел әрекет ету жасағы Есіл өзені мен Үлкен Тораңғұл көлінде суға батқан 17 адамды құтқарды. Десе де, қайғылы оқиғалар әлі де орын алуда. Коронавирусқа байланысты шектеу шаралары енгізілгенімен, өзен-көлдердің жағаларында демалушылардың қарасы қалың, – деді Нұрлан Бауыржанұлы.
Қызылжар ауданында көлде шомылған екі солтүстікқазақстандық қаза тапты. Кешкі сағат 20.00 кезінде департаменттің 112 нөміріне Желякова ауылының маңындағы Каменное көлінде ер адамдардың суға батып кеткені туралы хабар түседі. Оқиға орнына жеткен департаменттің құтқару жасағы мен аудандық төтенше жағдай бөлімінің мамандары 1977 және 1980 жылғы азаматтардың мәйіттерін жағаға шығарады. Белгілі болғандай, Петропавл қаласынан келген екі отбасы көл жағасында демалып, түнеуге қалады. Таңертең 40 жастағы азамат кішкентай қызымен бірге суға шомылады. Бір кезде ер-азамат суға бата бастайды. Ал оны құтқармақ болған жолдасы да қаза табады. 9 жасар қыз аман.
Бұған дейін Шахау ауылының жанындағы көлде 1983 жылғы азамат суға кеткен болатын. Аталмыш қайғылы оқиға 1 тамыз күні кешкі сағат 23.00-де орын алған. Ауыл тұрғыны екі шақырым жердегі Бригадское көліне үш досымен бірге барған. Жағалауда «ащы суды» сіміріп алған ол киімін шешпестен бірнеше рет көлге сүңгіген. Ал соңғы сүңгігеннен кейін жолдастары оны таба алмай қалады. Іздестіру жұмыстарына департаменттің 5 құтқарушысы мен 2 арнайы техникасы жұмылдырылды. Мәйіт тек бір тәуліктен кейін табылды. Қазіргі уақытта өлім себебін анықтау мақсатында сот-медициналық сараптама жасалуда.
Баяндамашының айтуынша, биыл волонтерлермен біріккен департамент өкілдері шомылуға рұқсат етілмеген орындарда 1280 рейд жүргізген. Демалушыларға, жалпы, 40 мың жадынама таратқан рейд өкілдері жағажай аумағында ішімдік ішкені немесе мас күйде жүргені үшін 331 құқық бұзушыны жауапкершілікке тартқан. Шомылу маусымы басталғалы тыйым салынған орында суға түскен 325 солтүстікқазақстандыққа айыппұл салынды.
Қанат АТАМАНОВ,
“Soltústik Qazaqstan”.