Мәркен Уәйісов – Тимирязев аудандық мәслихатының №3 сайлау округі бойынша депутаты, бюджет, салық, және қаржы, экология, кәсіпкерлік қызмет, экономика салаларын дамыту мәселелері жөніндегі тұрақты комиссияның төрағасы. «Северная Топливная Компания» ЖШС Сулы мұнай базасының меңгерушісі, «AMANAT» партиясының мүшесі.
Не үшін депутат болдым?
Тұрғындарға сайлауалды бағдарламамды таныстырған кезде округімнің, ауданның әрбір тұрғынының әл-ауқатын арттыру үшін барынша күш салуды басшылыққа алатынымды айтқан болатынмын. Мен қатарынан екі шақырылымда бағымды сынадым. Екеуінде де сайлаушылардың 70 пайыздан астам дауысын жинағаным – бұл сынақты абыроймен еңсергенімнің белгісі. Жергілікті тұрғындардың қолдауы – адамды адал еңбек етуге қанаттандырады. Еңбек жолымды осы ауданда бастадым. Комбайншы, Целинное ауылында астық қабылдау операторы мен меңгерушісі болып еңбек еттім. Сулы мұнай базасының менеджеріне дейін көтерілдім. Қазіргі уақытта «Северная Топливная Компания» ЖШС-ның Сулы мұнай базасының меңгерушісімін. 60 адамнан тұратын ұжымды 10 жыл басқарып келемін. Біздің серіктестіктің басты байлығы – ұжымы. Кәсіпорында білікті мамандар жұмыс істейді. Біз белсенді демалысқа, саламатты өмір салтын ұстануға көп көңіл бөлеміз. Осындай жүйелі жұмыс менің сайлауға түсуіме себепші болды. Адамның жүрген жолы, ортасы, көрген-түйгені, тәжірибесі белгілі бір белесті бағындыруға көмектеседі. Қарапайым жұмысшыдан бастап, еңбек сатысы бойынша көтерілуім, ұжыммен түсінісе жұмыс істеуім халықпен де тіл табысуыма, олардың көкейінде жүрген мәселелерді түсініп, шешуге мүмкіндік берді.
Сайлаушыларға қандай уәде бердім?
Аудандық мәслихат депутаттығына өз кандидатурамды ұсынған кезде әдеттегідей сайлау округінің әлеуметтік-экономикалық даму мәселелерін сараладым. Сайлаушылардың өтініштерін атқарушы органдармен бірлесе отырып, толық орындадым деуге болады. Бірақ бұл сайлау округінің барлық мәселелері шешілді деген сөз емес.
Елді мекендердің келбетін бұзатын қараусыз қалған ғимараттарды сүру мәселесі әлі де өзекті. Осындай түйінді мәселелерге бейжай қарамау – депутаттың міндеті. Бюджет, салық және қаржы, экология, кәсіпкерлік қызмет, экономика салаларын дамыту мәселелеріне жетекшілік ететін тұрақты комиссиясының төрағасы болғандықтан Тимирязев ауданының бюджетін бекітуге, нақтылауға, орындауға байланысты өзекті мәселелерді асқан жауапкершілікпен қараймын. Осыған қатысты тұрақты комиссияның 6 отырысы өтті онда аудан және 16 ауылдық округ бюджеттеріне өзгерістер енгізу туралы мәселелер қаралды.
Қай уәдемді орындадым?
Елді мекендердің инфрақұрылымы жақсарса, адамдардың өмір сүру деңгейі де көтеріледі. Оң нәтижелер бар екенін айта кеткен жөн. Ұрпаққа сапалы білім беретін мектептер жөнделіп, заманауи жабдықтар сатып алынуда, балаларға арналған және спорт алаңдары орнатылуда, жолдар қалыпты жағдайға келтірілуде. Мәселен, былтыр Хмельницкое ауылына кіреберіс жолды жөндеу аяқталды. Сол округтегі ауылдық клубта блок-модульдік қазандық орнатылды. Ал Докучаев ауылдық округінде медициналық пунктің құрылысы аяқталды.
Мен «AMANAT» партиясы аудандық филиалының депутаттық фракциясының төрағасымын. Сондықтан жыл бойы депутаттармен бірлесіп, ауданның әлеуметтік-экономикалық дамуы үшін маңызды мәселелер – сапалы ауызсумен қамтамасыз ету, білім беру, мәдениет, спорт, жол объектілерін салу және жөндеу сапасына мониторинг жүргіземін. Депутаттардың елеулі еңбегінің нәтижесінде Ақсуат, Дмитриевка, Степное ауылдарында мәдени- сауықтыру орталықтары пайдалануға берілді. Ақжан, Докучаев, Мичурин ауылдық округтерінде медициналық пунктердің құрылысы аяқталды. Тимирязев және Құртай ауылдық округтерінің кентішілік жолдары жөнделді. Сондай-ақ бірқатар оқу орындарында, өнер мектебінде және балабақшада күрделі және ағымдағы жөндеу жұмыстары жүргізілді.
Халық маған сене ме?
Мемлекеттік қызметшілер сияқты депутаттың да әр іс- әрекеті көпке үлгі-өнеге болуы керек. Мен саламатты өмір салтын ұстанамын. Хоккеймен бұрын кәсіби түрде айналысқандықтан әртүрлі деңгейдегі жарыстарға спорт командасының қатысуына үнемі демеушілік жасаймын. Әріптестеріммен бірлесіп аудандық «Лидер» футбол клубына демеушілік көрсетеміз. Әсіресе, жас хоккейшілерді белсенді қолдауға баса назар аударамыз. Себебі дарынды балалар – ауданның болашағы. Егер өскелең ұрпақ туған өлкенің қолдауы мен қамқорлығын сезінсе, ол өз елінің патриоты болып ержетеді.
Қазақ халқы «Жақсылық жасасаң да – өзіңнен, жамандық жасасаң да – өзіңнен» деп өмірдің түзуі мен бұралаңын екі ауыз сөзге сыйдырған. Яғни мейірімді, жанашыр болу адамның өзіне байланысты. Аудан депутаттары әрдайым мұқтаж жандарға көмектесу үшін қолдан келгеннің бәрін жасауға тырысады. Көмек сұраған жан шынымен де қысылып тұрса, оның бетін қайтарған емеспіз. Еңбек ардагерлеріне, тыл еңбеккерлеріне, зейнеткерлерге көңіл бөлінеді. Әрқайсысын жылы сөзбен демеу, материалдық жағынан қолдау аса маңызды. Сайлау округінің кез келген тұрғыны көкейде жүрген мәселелерін тікелей келіп айта алады. Әр айдың екінші сейсенбісі мен сәрсенбісі азаматтарды қабылдаймын. Мұндай ашық қабылдаулар мен кездесулер халық пен депутаттарды жақындастырады. Ал көтерілген проблемаларға жедел ден қою, кері байланыс орнату депутатқа ғана емес, жалпы билікке деген сенімді арттырады. Осындай кездесулердің қорытындысы бойынша тиісті органдарға жазбаша сұрау салып, оның шешілу жолын бақылауымда ұстап отырамын.
Дайындаған
Арайлым БЕЙСЕНБАЕВА,
«Soltüstık Qazaqstan».
Сайлаушы пікірі
Депутат Мәркен Уәйісов өзекті әлеуметтік мәселелерді шешуде белсенді және тұрғындардың өтініш-тілегіне жауапкершілікпен қарайды. Әсіресе, әлеуметтік салаға ерекше назар аударады. Сайлаушылар алдындағы адалдығының арқасында Мәркен Арыстанұлы жергілікті тұрғындармен тығыз байланыс орнатты. Оларды толғандырған мәселелерді назарда ұстап, өзектілерін шешу үшін қажетті шаралар қабылдауда. Ауылдың жүйелі дамуы үшін инфрақұрылымның маңызы зор. Жолдың сапасы жақсарса, елді мекендер арасындағы қозғалысты жеңілдетіп қана қоймай, ауылдағы экономикалық байланыстардың дамуына ықпал етеді. Депутат жанашырлық танытқан соң, тұрғындар да ауылдың қоғамдық өміріне белсенді араласады.
Ирина ПОПОВА,
Хмельницкое ауылының тұрғыны.