Адам ағзасын ауыстыру медицина саласының ең ірі жетістігі болып саналады. Бүгінде әлемнің озық мемлекеттерінде дене мүшесін трансплантациялау кеңінен дамыған. Біздің елімізде де ағза ауыстыру сәтті жүргізілуде. Десе де, ағза алмастыруды қажет ететін науқастарға донор тапшы. Өйткені, бұған жұртшылық тарапынан үрке қарайтындар көп. Жалпы, ағзаны трансплантациялауға, соның ішінде мәйіт донорлығына қоғамның көзқарасы қандай? Осы мәселе төңірегінде тұрғындар арасында сауалнама жүргізген едік.
Азамат СӘРСЕНОВ, діни қызметкер:
– “Доно” – латын тілінен аударғанда “сыйлаймын, құрбан етемін” деген мағынаны білдіреді. Әрбір дерттің өз шипасы бар. Асыл дініміз емдеу жолдарын іздеуді қолдайды. Ислам діні де адамды құтқаруды, көмек беруді құптайды. Сондықтан шариғатта донор болуға рұқсат берілген. Бірақ адам ағзасын саудаға салуға, бизнес көзіне айналдыруға болмайды. Мұхаммед пайғамбар (с.ғ.с) адамдардың іс-әрекеттері олардың ниеттеріне қарай бағаланады деген. Ал сау ағзаны мұқтаж адамға беру тәуекел ғана емес, үлкен сауап екенін айтқан жөн.
Қырмызы ҚҰРМАНҚЫЗЫ, жас маман:
– Мен мәйіт донорлығына қарсымын. Бұл – біздің қоғам үшін жат құбылыс. Бәлкім, бірнеше жылдан кейін мәйіт донорлығына етіміз үйреніп кететін шығар. Жалпы, елімізде “келісім презумпциясы” бар екенінен хабардармын. Яғни, адам өз еркі бойынша алдын ала емханаға барып, донор болуға келісім құжатына қол қойса, көз жұмған соң оның органдары трансплантацияға алынады. Бірақ кейде қайтыс болған адамдардың туған-туыстары мұндай қайырымдылыққа қарсы. Өйткені, біздің қоғам донор болуға дайын емес. Кейде адамдар материалдық жағдайын жасау үшін дене мүшесін ақшаға саудалайды. Ондай адамдарды мүлде түсінбеймін.
Гүлім КӨПЖАСАРҚЫЗЫ, көпбалалы ана:
– Ағза трансплантациясына қарсы емеспін. Егер қайтыс болған адам донор болуға алдын ала рұқсат берсе немесе туған-туыстары қарсылық танытпаса, мәйіттің сау ағзасын мұқтаж жанға беру ізгі амал деп ойлаймын. Қайтыс болған адамның мүшелерін трансплантациялау арқылы бір емес, бірнеше сырқаттың өмірін құтқарып қалуға болады. Адамдар бір-біріне қол ұшын созса, несі айып? Бүгінгі таңда донор тапшылығын ескерсек, қоғамды қайырымдылыққа тәрбиелеудің маңызы зор.
Сауалнаманы жүргізген
Ақмарал ЕСДӘУЛЕТОВА, “Soltústik Qazaqstan”.