Достық үйінде облыстық Қазақстан халқы облыстық ассамблеясының этномәдени бірлестіктері “Ұлт рухы” шарасына белсене қатысты. Қонақтардың назарына түрлі этнос өкілдерінің дәстүрлі ойындары ұсынылды.
Поляктардың “Коперник”, беларустардың “Радзiма” және “Дуслык” татар-башқұрт этномәдени орталықтарының өкілдері түрлі ойындар арқылы ұлттық ерекшеліктерін насихаттап, ересектер мен балалар көңіл көтеріп, уақытты қызықты өткізді. Ал “Қазақстанның орыс қауымдастығы” қоғамдық бірлестігі ұйымдастырған “Тақтайшалар” ойыны зейінділік, жылдамдық пен жинақылыққа негізделсе, украин мәдени орталығы қатысушыларды ортақ шеңберге біріктірді.
– Қалыптасқан дәстүр бойынша біздің орталық “Ұлт рухы” шарасына жылда белсенді қатысады. Әр жыл сайын жаңа ойын ұсынуға тырысамыз. Бүгін біз “Веточка” ойынын ойнадық. Бұл ойынға украиндармен бірге орыс, беларус, армян, поляк, татар мен тағы басқа этнос өкілдері қатысты. Біздің отбасымызда украин дәстүрін құрметтеуге ерте жастан баса көңіл бөлінеді. Үйде ғана емес, табиғат аясында да украин ойындарын ойнағанды жақсы көреміз. Ойын арқылы адамды жаңа қырынан тануға болады. Сондай-ақ ойын барысында біз әр этностың мәдениетімен, озық дәстүрлерімен танысамыз. Ал этностардың осындай өзара сыйластығы – тұрақтылық пен жарқын болашақ кепілі екенін айтқым келеді, – дейді “Солтүстік Қазақстан облысының украин мәдени орталығы” қоғамдық бірлестігінің жетекшісі Дмитрий Пытьев.
Іс-шара соңында “Қоғамдық келісім” КММ-нің жетекшісі Динара Оразбаева қатысушыларға ризашылығын білдіріп, этномәдени бірлестіктердің өкілдеріне Алғыс хаттар мен естелік сыйлықтар тарту етті.
Рабиға ЕРАЛЫ,
“Soltüstık Qazaqstan”.