Солтүстікқазақстандық кәсіпқой боксшы Евгений Павлов (3-0, 3КО) Ресейдің Новосібір қаласында өткен бокс кешінде жеңіске жетті.
Бұл жолы жерлесіміз Танзания елінің өкілі – Насибу Рамадханимен (31-16-2, 18КО) күш сынасты. Жартылай жеңіл салмақ тұжырымы бойынша өткен кездесу сегіз раундқа жоспарланған еді. Дегенмен ол бесінші раундта аяқталды. 21 жастағы боксшымыз 29 жастағы тәжірибелі қарсыласын нокаутқа жіберді. Осылайша шаршы алаңда сәтті өнер көрсеткен Евгений Павлов кәсіпқой рингтегі төртінші жеңісіне қол жеткізді.
Одан бөлек, бокс кешінде тағы екі қазақстандық былғары қолғап шебері өнер көрсетті. Ауыр салмақ дәрежесіндегі Данила Семенов (3-0, 2КО) шаршы алаңда Оңтүстік Африка боксшысы Осборн Матиманды (23-14-2 17КО) бірінші раундта нокаутқа түсірді. Ал екінші орта салмақтағы Бек Нұрмағанбет (4-0, 2КО) танзаниялық Тваха Кассиммен (17-8-1, 8КО) толық сегіз раунд бойы жұдырықтасып, төрешілердің шешімімен жеңіске жетті.
Нұржан СЕЙІЛБЕКОВ,
“Soltüstık Qazaqstan”.