Конституция күні қарсаңында Қызылжар ауданында екі жаңа нысан іске қосылды. Соның бірі ағаш көмірін өндіру цехы болса, екіншісі асфальт-бетон өндіру зауыты.
Бескөл ауылының Луговая көшесінде орналасқан ағаш көмірін өндіру цехының ашылуы салтанатты түрде өтті. Оған Қызылжар ауданының әкімі Жанат Сәдуақасов, облыстық кәсіпкерлік және туризм басқармасының басшысы Құралай Жарова, Білім және ғылым министрлігі “Ғылым қоры” АҚ-ы жобалау дирекциясының директоры Құрманғазы Омаров қатысты.
Жобаны жүзеге асырып жатқан “Ахмудинов” жеке кәсіпкерлігі өңіріміздегі ірі ағаш өндіруші кәсіпорындардың бірі. Кәсіпорын басшысы Сермұхамед Оралұлының айтуынша, бұл еліміздегі ғылыми-инновациялық бағыттағы бірегей жоба. Негізгі мақсаты Солтүстік Қазақстанда орман шаруашылығы мен ағаш өндірісінің коммерциялық және экологиялық кластерін ұйымдастыру. Сондықтан ол ғылыми-техникалық бағыттағы мемлекеттік гранттың аясында жүзеге асып жатыр.
Жаңа нысанның лентасын Қызылжар ауданының әкімі Жанат Сәдуақасов пен Білім және ғылым министрлігі “Ғылым қоры” АҚ-ы жобалау дирекциясының директоры Құрманғазы Омаров қиды. Содан соң жиналған жұртшылық цехтың ішін аралап, жұмысымен танысты.
Цехта төрт пеш орнатылған. Әр пеш тәулігіне бір тонна ағаш көмірін өндіре алады. Бүгінде18 адам тұрақты түрде жұмыспен қамтылған.
Жобаның екінші кезеңінде “Ахмудинов” жеке кәсіпкерлігі қылқан жапырақты ағаш өсіруге арналған жылыжайлар тұрғызуы тиіс. Бүгінгі таңда жылыжайдың құрылысы аяқталды. Енді қылқан жапырақты ағаштар отырғызу жұмыстары жүргізілетін болады. Ол үшін арнайы мамандар да шақыртылған. Болашақта көшеттерді кәсіпорын кескен ағаштардың орнына отырғызады.
Аудан басшысы Жанат Сәдуақасов пен облыстық кәсіпкерлік және туризм басқармасының басшысы Құралай Жарова жақында ғана ашылған асфальт-бетон зауытының жұмысымен танысты.
Аталмыш нысан “Грант Север” ЖШС-не тиесілі. Шетелдік инвесторлардың көмегімен мұнда асфальт-бетон қоспасын өндіретін заманауи қондырғылар орнатылған, соның арқасында зауыт экологиялық таза өнімдер шығарады.
Зауыттың жобалық құны 450 миллион теңге. Мұнда 25 адам тұрақты жұмыспен қамтылған.
– Технологиялық тұрғыдан қарасақ, мұндағы қондырғылардың барлығы да соңғы үлгіде жасалған. Асфальт қоспасы құрылғысы толық компьютерлендірілген және климат-басқару жүйесі де бар. Электр құрылғылардың барлығы да Еуропа елдерінен әкелінген. Ең бастысы зауыт сырттай үлкен болып көрінгенімен, дыбыссыз жұмыс істейді деп айтуға болады, – дейді “Грант Север” ЖШС-нің операторы Игнат Новиков.
Асфальт-бетон зауыты өңіріміздегі осы бағыттағы ең ірі кәсіпорындардың бірі болып саналады. Ол сағатына 160 тонна асфальт-бетон қоспасын өндіре алады. Жаңа кәсіпорындардың ашылуы ауданның бюджетіне кіріс әкеліп қана қоймай, отандық өнім нарығын қалыптастыруға және өңіріміздің экономикасының дамуына серпін беретіні сөзсіз.
Фархат ТАСТАМБЕК, журналист.
СУРЕТТЕ: асфальт-бетон зауытының сыртқы көрінісі.
Суретті түсірген автор.