Петропавлда биылғы алғашқы жалпықалалық сенбілік өтті. Іс-шараның мақсаты – қыстан кейін көшелер мен қоғамдық орындарды қоқыстан тазартып, ретке келтіру. Бұл сенбілік «Таза Қазақстан» жобасының аясында облыс әкімінің тапсырмасы бойынша жүзеге асырылды.
Мұндай сенбіліктер үш ай бойы үздіксіз өткізіледі. Соның аясында көптеген абаттандыру іс-шарасын ұйымдастыру жоспарланған. Бұл жолғы сенбілікке қала тұрғындары, қоғам белсенділері, кәсіпкерлер, сондай-ақ мемлекеттік қызметшілер қатысып, тазалыққа өз үлестерін қосты.
Петропавлдың әкімі Серік Мұхамедиев осындай іс-шаралар қала тазалығын қамтамасыз етуде ерекше маңызға ие екенін атап өтіп, қала тұрғындарын белсенді болуға шақырды.
«Қаланы абаттандыру бойынша үш айлық басталды. Осыған байланысты қала тұрғындарын осы іс-шараға қатысуға шақырамын. Біз қаланы тазартып, тәртіпке келтіруіміз қажет», – деді әкім.
Қала басшысының айтуынша, үш айлық аясында әр апта сайын «Таза бейсенбі» күндері және мезгіл-мезгіл сенбіліктер ұйымдастырылмақшы.
Сенбілікке 3 мыңға жуық адам қатысып, бірлескен күш- жігердің арқасында 2 мың тонна қоқыс жиналып, шығарылды. Жұмысты жеңілдету үшін арнайы техника қолданылды. 10 КамАЗ және 5 тиегіш машина көмекке келіп, көшелер мен аулаларды, сондай-ақ қоғамдық орындарды тез тазартуға ықпал етті.
Ақерке ДӘУРЕНБЕКҚЫЗЫ,
«Soltüstık Qazaqstan».