Өңірімізде суға түсуге арналған 58 арнайы жағажай бар. Тек сол аумақтарда ғана шомылуға рұқсат. Күн ысығанымен, су әлі жылына қойған жоқ. Алайда айдындарды жағалаған жұрттың қарасы қалың. Өңір басшысы Құмар Ақсақаловтың төрағалығымен өткен әкімдік отырысында судағы сақтық шаралары және балалар мен жасөспірімдердің жазғы демалысын ұйымдастыру мәселесі сөз болды.
Әкімдік отырысы жаңадан тағайындалған басшыларды таныстырудан басталды. “Азаматтарға арналған үкімет” мемлекеттік корпорациясы” АҚ-ы төрағасының өкімімен Жәнібек Бекұлы Қамбаров акционерлік қоғамның облыстық филиалының директоры болып тағайындалды. Осы тағайындауға дейін Жәнібек Бекұлы аталмыш филиал басшысының орынбасары қызметін атқарған болатын. Ал “Қазпошта” АҚ-ы басқарма төрағасының бұйрығымен Нұркен Иманбекұлы Рүстем жергілікті филиалдың директоры болып тағайындалды. Ол бұған дейін Жамбыл облысы филиалы директорының орынбасары болып қызмет еткен. Өңір басшысы жаңа басшыларға жауапты қызметтерінде сәттілік тіледі.
Жағажайлардағы жағдай бойынша есеп берген облыстық төтенше жағдайлар жөніндегі департамент бастығы Рамиль Камаловтың айтуынша, өңірде 60-тан астам өзен мен 2 мыңнан астам көл бар. Барлығында бірдей шомылуға рұқсат жоқ. 12 көл мен Есіл өзенінде суға түсуге арналған 58 арнайы орын бекітілді. Соңғы екі аптадан бері ауа температурасы 35 градусқа дейін көтерілді. Облыс тұрғындары суға шомылу маусымының басталғанын тоспай-ақ Есіл өзені мен Пестрое көліне қарай ағылуда. Синоптиктердің болжамынша, жоғары температура мамыр айының соңында дейін сақталады. Яғни, жағажайлардағы адамдар әлі де көбейеді деп күтілуде.
Былтыр карантин кезінде жағажайлар жабылып, тұрғындар құтқарушылардың бақылауына алынбаған орындарда жасырын шомылған. Салдарынан суға кеткендердің саны күрт өсті. Рамиль Фаткулович бұл жолы Петропавл қаласы және аудан әкімдіктерімен бірлесіп, жағажайларда суға түсуге рұқсат беру қажеттігін айтты. Облыс әкімі департамент басшысының бұл ұсынысын құптады.
– Былтыр пандемияға байланысты көптеген жағажайларда суға түсуге тыйым салған болатынбыз. Себебі адам көп шоғырланатын жерлерде коронавирусты жұқтыру қаупі жоғары болды. Ал бүгіндері жағдай біршама тұрақталды. Індетке қарсы вакцина егу шаралары жүргізілуде. Сондықтан бұл жолы жағажайлар жабылмайды. Облыс орталығындағы екі ресми жағажай 1 маусымға дейін қалпына келтірілуі тиіс. Ең бастысы, жағада әлеуметтік қашықтықты сақтап, санитарлық талаптарды орындау маңызды, – деді Құмар Іргебайұлы.
Аудандарда 48 жағажай дайындалған. Дегенмен Ақжар, Аққайың, Жамбыл, Мағжан Жұмабаев, Тайынша және Тимирязев аудандарында суға түсетін бір де бір арнайы орын жоқ. Сондықтан жергілікті тұрғындар рұқсат етілмеген жерлерде шомылуға мәжбүр. Төтенше жағдайлар жөніндегі департаменттің құтқарушылары аудан әкімдіктерімен бірлесіп, барлық жағажайларды ерекше бақылауға алмақ.
Әкімдік отырысында балалар мен жасөспірімдердің жазғы демалысын ұйымдастыру жайы да талқыланды. Облыстық білім басқармасының басшысы Гүлмира Кәрімованың айтуынша, биыл балаларды демалыс шараларымен 100 пайыз қамту көзделіп отыр. Мектептердің жанындағы орталықтарда 45 мың, ал аула клубтарында 3,5 мың оқушы тынығады. Ал аз қамтылған отбасылардан шыққан 7 мыңға жуық баланы жазғы демалыс лагерьлеріне жіберу жоспарланған. Бұл мақсатқа облыс бюджетінен 78 млн. теңге қарастырылған. Мектеп оқушыларының алаңсыз демалысын ұйымдастыруға кәсіпкерлер де қолұшын созуда. Ауыл шаруашылығы құрылымдарының басшылары 717 оқушыға 11 млн. теңгенің жолдамасын алып берді. Сегіз ауданның және облыс орталығының лагерьлері балаларды санитарлық-эпидемиологиялық ережелер мен шектеу талаптарын сақтай отырып қабылдамақ. Лагерь қызметкерлері вакцина алуда. Қазірге дейін 65 пайызы екпе алып үлгерген. Балалар лагерьлерге барар алдында ПТР-тест тапсырады.
– Биыл лагерьлерде жөндеу жұмыстары жалғасады. Нысандардың ағымдағы және күрделі жөндеуіне бюджеттен 118 млн. теңге бөлінді. Демеушілерден жиналған қаражат 102 млн. теңгені құрады. 1950-1970 жылдары ашылған бұл демалыс орындарының көбі тозған. Сенімді басқаруға берілген екі лагерь инвестордың қаражатына толық жөндеуден өтті. Биылғы жазғы демалыс орындары маусымның 15-нен өз жұмысын бастайды, – деді Гүлмира Райынбекқызы.
Қанат АТАМАНОВ,
“Soltüstık Qazaqstan”.