Жазушы, журналист Жақсыбай Самраттың 60 жасқа толған мерейтойына орай Сәбит Мұқанов атындағы облыстық ғылыми-әмбебап кітапханада «Қарымды қаламгер» атты кеш өтті. Зиялы қауым өкілдері мен ардагерлер мерейтой иесін құттықтап, шығармашылық жолы жайында әңгіме өрбітті.
Есіл ауданының Тауағаш ауылында дүниеге келген қаламгер 1993 жылдан бері облыстық, республикалық бұқаралық ақпарат құралдарында еңбек етіп, қоғамның өзекті мәселелерін қозғап, әдебиетсүйер қауымға тың дүниелерімен танылды. Ол 2004 жылдан «Egemen Qazaqstan» газетінде саяси шолушы қызметін атқарды. Жиын барысында журналистің қоғам өмірінде орын алған кемшіліктерге бейжай қарамай, сын мақалалар жазуда белсенді екені сөз етілді. «Жақсыбай Баянұлының есепшілік жолдан түпкілікті бас тартып, руханиятқа бет бұруы кездейсоқ емес. Ол әділдіктің туын ұстаған марқұм Мәлік Мұқановтан кейінгі ақиқатты тура айта алатын қаламы қарымды қаламгер ретінде танылды. «Бітеу жара» романының өзінде 1986 жылы болған оқиғаны шынайы жеткізіп, жастардың жазықсыз жапа шеккенін ашықтан-ашық жазды», – деді өз сөзінде еңбек ардагері Құдайберген Қалиев.
Облыстық ардагерлер кеңесінің төрағасы Ескендір Елеусізов қаламгердің азаматтық қырына тоқталды. Алдыңғы буын ағалардың ойын қаламгердің ізін басқан журналист, «Qazaqstan» ұлттық арнасының өңіріміздегі меншікті тілшісі Сағындық Мауғазин жалғай түсті. М.Қозыбаев атындағы СҚУ-дің профессоры Жанар Таласпаева жазушының шығармашылығына талдау жасады.
Гүлбике КУБЕНОВА,
«Soltústik Qazaqstan».