“Қарғалы аралындағы” табиғаты әсем жерге орналасқан “Достық” және “Ақ қайың” балаларды жазғы сауықтыру лагерьлерінде саф ауамен тыныстап, жайлы климаттық жағдайда демалушы балалар саны аз емес. Маусым-тамыз аралығында бұл лагерьлерде 2300-ге жуық бала сауықпақ. Олардың 800-ден астамы – аз қамтылған және көпбалалы отбасыларының балғындары.
Қаладағы жүйткіген көліктердің түтіні мен қапырық ауасынан сытылып, табиғат ананың өзі кестелеген әсем қойнауына сүңгіген балалардың жүздері балбұл жанады. Қыс бойы білім теңізінен інжу теріп, құмырсқадай еңбектенген балғындардың жазғы сауығуына лагерьде барлық жағдай жасалған. Ертегі әлеміндегідей таңғажайып түстермен безендірілген сауықтыру орнындағы түрлі кейіпкерлер мен мүсіндер аса талғампаздықты танытады. Ол балалар тұрмақ, ересек адамдардың өзін бейқам балалық шаққа еріксіз жетелейді.
– Жас ерекшеліктеріне қарай топтарға бөлінген балаларға тәрбиешілер мен вожатыйлар жетекшілік етеді. Олар балалардың демалыс уақытын есте қаларлықтай етіп өткізуіне, жайлы тұруына, тамақтануына, түрлі рухани-мәдени-спорттық шараларға қатысып, жан-жақты дамуларына жағдай жасайды. Тәрбиеші-педагог пен вожатыйлыққа жоғары немесе орта арнаулы педагогикалық білімі бар, арнайы даярлықтан өткен, балалармен тіл табыса алатын, жан-жақты мамандар таңдалды, – дейді “Достық” лагерінің директоры Бейнегүл Оралбаева.
Лагерьде балалардың күнделікті денсаулықтарын бақылап, олардың ішетін ас мәзірін қадағалап отыратын білікті мейірбике медициналық көмек көрсетеді. Тынығушыларға тәулігіне бес мезгіл түрлі ас мәзірі ұсынылады. Оның құрамына құнарлылығы жоғары тағамдармен қатар, жаңа пісірілген кулинарлық тәттілер, жеміс-жидектер мен көкөністер, сүт өнімдері енгізілген.
Сауықтыру лагерінде бір-біріне ұқсамайтын, ойнай отырып, ойлауға жетелейтін, бұқаралық спортты насихаттай отырып, балаларды саламатты өмір салтына баулуға, ой-өрістерін кеңейтуге, жеке тұлға болып қалыптасуға, өздеріне деген сенімдерін шыңдауға баулитын шаралар өткізіледі. Туған өлкеге саяхаттар ұйымдастыру арқылы отаншылдық сезімдерін қозғайтын, мамандық таңдауға, үнемшілдікке баулитын, қызықты, жоспарлы бағдарламалар ұйымдастырылып, қазақ және ағылшын тілдерін меңгеруге арналған лингвистикалық жобалар іске асырылады.
Қатар қонған “Достық” және “Ақ қайың” лагерьлеріндегі балалар арасында тек көршілік емес, жолдастық қарым-қатынас орнаған. Екі лагерь арасында спорттық сайыстармен қатар, түрлі бағыттағы бірлескен шаралар да жиі өткізіледі.
– Келген бетте бір-бірімізді тосырқап едік, қазір өзара достасып алдық. Тәрбиеші-педагогтермен және вожатыйлармен де қимай қоштасатын болдық, – дейді демалушылар.
Облыста тоғыз ай бойы білім нәрімен сусындаған балауса балғындардың демалыс уақыттарын таза ауа, әсем табиғат аясында өткізіп, жаңа оқу жылына жақсы көңіл күймен кірісулері үшін 17 сауықтыру лагері жұмыс істеуде. Бірінші ауысымда үш мыңға жуық оқушы тынықса, жаз бойы сауықтыру орындарында он үш мыңнан астам оқушы демалып, бой сергітпек. Олардың он мыңға жуығы – аз қамтылған және көпбалалы отбасылардан шыққан бүлдіршіндер.
Сонымен қатар, маусым айында төрт жарым мың балғын мектеп жанында ұйымдастырылған сауықтыру алаңдарында демалды.
Ләйла ЖАНЫСОВА,
“Солтүстік Қазақстан”.
Суретті түсірген
Амангелді БЕКМҰРАТОВ.