ЖАЙНА, СҮЙІКТІ ҚАЛАМ!

Қатерлі індеттің таралуына бай­ланысты қызыл­жарлықтар­ Қа­ла күнін онлайн үлгіде атап өтті. Жылда орталық алаңда сән-салтанатымен өткізілетін мерекелік шараларды әлеуметтік желілер арқылы тамашалады.

Облыс орталығының 268 жыл­ды­ғына арналған шаралардың шы­мыл­дығы “Балалық шақтың қала­сы” атты бір сағаттық театр­лан­ды­рылған қызықты ­ойын­дармен түріліп, кейін өңір өнер­паздары­ның қатысуымен өткен концерттік бағдарламаға ұлас­ты. Сонымен қатар қаланың та­рихынан сыр шерткен “Ескерт­кіштер, обе­лисктер, мемориал­дар. Қаланың мұ­расы” деген атау­мен шағын эк­скурсия көрсе­тілді. Қала тұрғын­да­ры облыс­тық тарихи-өлкетану мұражайы қорындағы өткен ға­сырларға тиесілі көне бұйым­дар­ды тама­шалап, Петропавл қала­сы­ның арғы-бергі тарихымен та­нысты. Мұражайдың экскурсия жүр­гізушісі Кристина Мусенконың айтуынша, жәдігерлер қатарын­да бекініс құрылған кезден бас­тап қолданыста болған ыдыс-аяқ, қа­ру-жарақ, киім-кешек жә­не түрлі бұйымдар бар. Соны­мен қатар өңірімізге есімдері белгілі кө­пес­тердің жеке заттары да көрсетіл­ді. Мәселен, “Фор­туна” музыка­лық жәшігі ХХ ға­сырдың басында Германияда жасалған екен. Оны 1976 жылы Мавлютов есімді аза­мат мұра­жайға табыс еткен.­ Мұ­ражай мамандары сыры кетсе де сыны кетпеген күйсандықты қо­сып, келушілерге әсем әуен тың­датады екен.
Осы күні қала тұрғындары ара­сында өткен “Қала туралы поэ­зия” интернет байқауы қоры­тын­дыланды. Бұл байқауға бүл­дір­­шіндерден бастап­, ересек­терге дейін белсенді қатысты. Тырнақ­алды туындыларын ұсы­нып, өнер­лерін көрсеткен Мерей­ Се­рік­пай, Даяна Әли, Зарина­ Мол­дах­метова 1-орынға лайық деп танылды. Ал ересектер ара­сында “Мәнерлеп оқу” аталымы бойын­ша Жайна Шерниязова жеңімпаз болса, өз өлеңін ұсын­ған Гүлшат Нұржақыпова 1-орын алды.
Қала күні қарсаңында “Жайна сүйікті қалам” атты флорис­тика­лық байқау ұйымдастырылған болатын. Бұл байқаудың да же­ңімпаздары анықталды. Ереже бойынша қатысушылар дала­ гүл­дерінен әсем гүл шоқтарын жа­сауы тиіс еді. Даланың көздің жа­уын алар гүлдерінен десте өрген Людмила Лукьянова жеңімпаз деп танылды. “Қала күнінен үздік бейнесурет” сайысына қатысу­шы­лар да өткен жылдарда тү­сірілген фотоларды жіберіп, бел­сенділік танытты. Қаланың соң­ғы жылдағы тарихынан сыр шертер байқау барысында әуесқойлар түсірген суретте­р көп­тің назарына ұсынылып, үздік­тер анықталды.
Ал кеш бата “Туған қаланың шамдары” атты онлайн-концерт өтті. Мұның барлығы әлеуметтік желіде көрсетілді.  

Сурет: http://petropavl.sko.gov.kz/