Ел қорғау үшін бойда намыс, табандылық пен тас түйін дайындық қажет. Бұл мақсатта жұмыс істеп жатқан “Жас сарбаз” әскери-патриоттық қозғалысын ерекше атап өткен жөн Әскери-патриоттық клубтың басты міндеті – балалардың бойында Отанға деген сүйіспеншілікті тәрбиелеу. “Жас сарбаз” әскери-патриоттық қозғалысын құруды Елбасы Нұрсұлтан Назарбаев “Қазақстандықтардың әл-ауқатының өсуі: табыс пен тұрмыс сапасын арттыру” атты Жолдауында тапсырған болатын. Қоғамдық бірлестік құрылып, барлық облыстарда филиалдары ашылды. Қазір өңірдегі 315 әскери-патриоттық клуб пен жалпы орта білім беретін мектептерде “Жас сарбаз” сыныптары жұмыс істейді. Олардың құрамындағы өрендер саны 5 мыңнан асады.
Әскери-патриоттық клубтар әр мектепте бар. Алғашқы әскери дайындық пәнімен астарлас жүргізіледі. Жетекшісі – сол пәннің оқытушылары. Бір мектепте сарбаз саны – 25, енді бірінде 30 болуы мүмкін. Орталықта әр аптаның сейсенбі күні сарбаздардың жиыны өтеді. Жиында оқушылар саптық дайындық, қару-жарақты бұзып-жинаудан өзге, әскери жарғылар, Қазақстанның қазіргі армиясы сынды тақырыптар бойынша білім алады. Бұдан бөлек, ауған соғысы ардагерлерімен, әскери қызметкерлермен, азаматтық борышын өтеген жастармен кездесулер тұрақты түрде ұйымдастырылуда. Жеңіл атлетикадан жасөспірімдер арасында спорттық марафон, əскери-патриоттық əндер байқауы, қарттар жəне балалар үйлеріне қол ұшын беру сияқты ізгілікті істер де жүйелі түрде өткізіледі.
Өңірімізде қоғамдық бірлестіктің ашылғанына көп уақыт өте қойған жоқ. Алайда қазіргі уақытта оның құрамында 6 мыңнан астам ұйым бар. Оған 200 мыңнан астам оқушы белсенді қатысады. Қозғалысқа қабылдауда ешқандай шектеулер жоқ. Тіпті 7-8 сынып оқушылары да әскери қызметтің әліппесімен таныса алады. Негізгі басымдық спортқа жақын, өнерлі жастарға беріледі. Бұдан бөлек, оқушылардың жоғары технологиялық өндіріс, инновациялар және инженерлік әзірлемелер саласына деген қызығышулығын арттыру мақсатында елімізде “Smart sarbaz” жобасы сәтті жүзеге асырылуда. Солтүстік Қазақстан облысы қатысушылардың саны және шаралардың сапасы бойынша өңірлер арасында көш бастауда. Атап айтқанда, қазіргі уақытта облыста оқушыларды робототехниканың қыр-сырына үйрететін 52 үйірме бар. Олардың жұмысы технологиялық бағытты ұстанған.
Былтыр “Айбын – 2020” республикалық әскери-патриоттық жастар жиыны алғаш рет онлайн-форматта өтті. Жастардың бойында Отанға, туған елге деген сүйіспеншілік сезімдерін, қазақстандық патриотизмді қалыптастыруды көздеген шарада Петропавл қаласындағы №40 мектеп жанынан құрылған “Жас батыр” әскери-патриоттық клубының өрендері облыс намысын қорғады. Олардың қатарында түрлі додаларда жасындай жарқылдап жүрген Виктория Калинина, Анастасия Погребняк, Мұрат Санжар, Матвей Баев, Мирас Балапан, тағы басқа оқушылар бар. Жарыс қатысушылары зияткерлік ойын, саптық, медициналық дайындық, атыс қаруларын, робототехниканы меңгеру, күш сынасу секілді кезеңдерде сынға түсті. Өрендеріміз жеңістің биік тұғырынан көріне білгенін мақтан тұтамыз.
Былтыр Петропавл қаласында Қорғаныс министрі Нұрлан Ермекбаев, Солтүстік Қазақстан облысының әкімі Құмар Ақсақалов және “Жас сарбаз” балалар мен жасөспірімдер әскери-патриоттық қоғамдық бірлестігінің басшылығы ынтымақтастық, өзара іс-қимыл туралы меморандумға қол қойғанын атап өткен жөн. Бұл үшжақты келісім өңірде әскери-патриоттық тәрбие беру жұмыстарын одан әрі жандандыра түсуге серпін береріне сенімдіміз.
Жарас ЖЕҢІСОВ,
“Жас сарбаз” әскери-патриоттық қозғалысы облыстық филиалының төрағасы.